ئەندامێكی پەرلەمانی ئێران ئاشكرای دەكات، بەشێك لەو ئامێرە پەیوەندییانەی پەیجەر و بێتل كە هەفتەی رابردوو لە وڵاتی لوبنان تەقێنرانەوە و دەیان كوژراو و هەزاران برینداری لێ كەوتەوە، لەلایەن ئێرانەوە بۆ حزبوڵا كڕابوون و دابین كرابوون.
ئەحمەد ئەردستانی ئەندامی لیژنەی ئاسایشی نیشتمانی لە پەرلەمانی ئێران رایگەیاند: ئێران بەشداری راستەوخۆ كڕین و دابینكردنی بەشێك لەو ئامێرانەی پەیوەندیكردنی پەیجەر و بێتەلی كردبوو بۆ ئەندامانی حزبوڵا.
ئەندامەكەی پەرلەمان بە ماڵپەڕی (دیدەبان ئێران)ی راگەیاندبوو: بەدڵنیاییەوە ئێران دەستی لە كڕینی ئامێرەكان هەبووە و تەنانەت یەكێك لەو ئامێرانەش كە كڕابوون بە دەستی باڵیۆزی ئێران بوو لە بەیرووت.
ئاشكراشی كرد: پێشتریش ئیبراهیم رەئیسی سەرۆك كۆماری پێشووی ئێران هەمان ئامێری پەیوەندیكردنی لەوجۆرەی بەكاردەهێنا، بۆیە گومان دەكرێت كەوتنەخوارەوەی فڕۆكەكەشی هەر لە رێگەی تەقاندنەوەی ئامێرەكانەوە روویدابێت.
رۆژانی سێشممە و چوارشەممەی هەفتەی رابردوو لەلایەن ئیسڕائیلەوە و لە رێگەی هێرشی ئەلیكترۆنییەوە هەزاران ئامێری پەیوەندیكردنی پەیجەر و بێتەلی لە لوبنان تەقێنرانەوە، بەگوێرەی دوایین ئاماری وەزارەتی تەندروستی لوبنان بەهۆی تەقینەوەكان 37 كەس كوژران و نزیكەی 3 هەزار كەسی دیكەش بریندار بوون.
یەكێك لە بریندارەكانی هێرشەكە موجتەبا ئامانی باڵیۆزی ئێران بوو لە لوبنان كە خۆی و دوو لە پاسەوانە تایبەتەكانی بە سەختی بریندار ببوون، رۆژی پێنجشەممەی رابردووش بۆ چارەسەری بەپەلەی پزیشكی گەیەنرانەوە ئێران.
کۆمێنت (0)
تا ئێستا هیچ کۆمێنتێک نەکراوە.