بوومەلەرزەیەک باکووری ڕۆژهەڵاتی ئەفغانستانی هەژاند

لە ویلایەتی باهداشانی باکووری ڕۆژهەڵاتی ئەفغانستان، بوومەلەرزەیەک بە گوڕی 5،4 پلە بەپێوەری ڕێختەر ڕوویدا.

ناوەندی توێژینەوەی جیۆلۆجی ئەمریکا (USGS)، بڵاویکردەوە کاتژمێر 10:26ی خوله‌كی پێش نیوه‌ڕۆی ئه‌مڕۆ پێنجشه‌ممه‌، بوومەلەرزەیەک بە گوڕی 5،4 پلە بەپێوەری ڕێختەر قەزای ئەشکاشیمی ویلایەتی باهداشانی هەژاندووە.

بوومەلەرزەکە کە چەقەکەی قەزای ئەشکاشیم بووە، لە قووڵایی 224 کیلۆمەتر ڕوویداوە و، هێشتا زیانەکانی ڕانەگەیەندراوە.

بوومەلەرزەکە لە کابوڵی پایتەخت و ویلایەتەکانی باکووری ئەفغانستان و وڵاتانی دراوسێ وەک تاجیکستان و پاکستان هەستیپێکراوە.

باهداشان کە دەکەوێتە سەر چیاکانی هیندیکوش لە باکووری ڕۆژهەڵاتی ئەفغانستان، ناو بە ناو بوومەلەرزە تیایدا ڕوو دەدات.