سبەی پێنجشەممە تەرمی ئیسماعیل هەنییە سەرۆكی مەكتەبی سیاسی بزووتنەوەی حەماسی فەڵەستینی لە ئێرانەوە بەڕێ دەكرێ و دووسبەی هەینی لە وڵاتی قەتەڕ بە خاك دەسپێردرێت.
بەگوێرەی زانیاری میدیا فەڵەستینییەكان، بڕیارە سبەی پێنجشەممە لە رێوڕەسمێكدا تەرمی ئیسماعیل هەنییە لە تارانەوە رەوانەی وڵاتی قەتەڕ بكرێت.
رۆژی هەینی داهاتووش بەهەمانشێوە بە ڕێوڕەسمێك لە دۆحەی پایتەختی قەتەڕ، تەرمی هەنییە بە خاك دەسپێردرێت.
بزووتنەوەی حەماس رایگەیاندووە كە دووسبەی دوای نوێژی هەینی، لە ڕێوڕەسمێكی جەماوەریدا تەرمی هەنییە بە خاك دەسپێرن.
ئەمڕۆ چوارشەممە ئیسماعیل هەنییە سەرۆكی مەكتەبی سیاسی بزووتنەوەی حەماس لە هێرشێكدا لە تارانی پایتەختی ئێران كوژرا، دوای ئەوەی دوێنێ سیشەممە بەشداری لە ڕێوڕەسمی سوێندخواردن و دەستبەكاربوونی مەسعوود پزیشكیان سەرۆك كۆماری ئێران كردبوو.
میدیاكانی ئێران بڵاویان كردەوە كە هەنییە لە رێگەی مووشەكێكەوە كە لە دەرەوەی ئێران ئاراستەكراوە، كراوەتە ئامانج و كوژراوە.
کۆمێنت (0)
تا ئێستا هیچ کۆمێنتێک نەکراوە.