سبەی سێشەممە شەپۆڵێكی دیكەی گەرما دەگاتە عێراق، كاریگەری گەرماكە زیاتر لە پارێزگاكانی ناوەڕاست و باشووری عێراق دەبێت، لە هەرێمی كوردستانیش كەشوهەوا تاڕادەیەك باشتر دەبێت.
بەگوێرەی ئەو خشتەیەی دەستەی كەشناسی عێراق بڵاوی كردۆتەوە، سبەی سێشەممە شەپۆڵێكی دیكەی گەرما دەگاتە عێراق، پلەكانی گەرما لەو رۆژەدا لە پارێزگاكانی ناوەڕاست و باشوور لەنێوان 47 بۆ 49 پلەی سیلیزی دەبێت.
گەرمای شەپۆڵەكە دووسبەی چوارشەممە دەگاتە لووتكە، بەشێوەیەك كە لە 8 پارێزگای باشوور پلەی گەرما 50 پلەی سیلیزی دەبێت، ئەوانیش پێكهاتوون لە پارێزگاكانی واست، بابل، نەجەف، دیوانیە، میسان، ناسڕیە، موسەننا و بەسڕە.
بۆ ڕۆژی هەینی پلەكانی گەرما كەمێك نزمتر دەبنەوە، بەڵام لە پارێزگاكانی میسان، ناسڕیە، موسەننا و بەسڕە هەر بەبەرزی و لە 50 پلەی سیلیزی دەمێنێتەوە.
سەبارەت بە هەرێمی كوردستانیش، شەپۆڵە گەرماكە تاڕادەیەك كاریگەری لە ناوچەكان كەمتر دەبێت، پلەی گەرما لەنێوان 40 بۆ 45 پلەی سیلیزی دەبێت.
هەر ئەمڕۆ دووشەممە پارێزگاری بەسڕە بەهۆی بەرزبوونەوەی پلەكانی گەرما، بەفەرمی رۆژی پێنجشەممەی داهاتووی لە پارێزگاكە كردە پشوو.
کۆمێنت (0)
تا ئێستا هیچ کۆمێنتێک نەکراوە.