200 هەزار گەشتیار لە ڕۆژانی جەژندا سەردانی هەرێمی كوردستانییان كردووە

لە ڕۆژانی جەژنی ڕەمەزاندا، زیاتر لە 200 هەزار گەشتیار سەردانی هەرێمی كوردستان و ناوچە گەشتیارییەكانیان كردووە.
ئیبراهیم عەبدولمەجید، بەڕێوەبەری ڕاگەیاندن و پەیوەندییەكان لە دەستەی گەشتوگوزاری هەرێمی كوردستان، بە فەرمانگەی میدیا و زانیاریی ڕاگەیاند: لە ڕۆژانی جەژنی ڕەمەزاندا لە 8 ی 4 تاكوو 13 ی 4 (لە شەش ڕۆژدا) زیاتر لە 200 هەزار گەشتیار سەردانی هەرێمی كوردستانیان كردووە.
"گەشتیاران زۆربەیان هی ناوەڕاست و خوارووی عێراق و ئێران و توركیا و وڵاتانی ترن، هاوكات ژمارەیەكی زۆری گەشتیاری ناوخۆیی لە ناو هەرێمی كوردستاندا كە ژمارەیان دەگاتە 150 هەزار كەس، سەردانی سەیرانگە و ناوچە گەشتیارییەكانیان كردووە".
لە بۆنەكاندا و بە تایبەت لە جەژنی ڕەمەزان و قوربان، هاوڵاتییەكی زۆری ناوەڕاست و خوارووی عێراق سەردانی هەرێمی كوردستان و ناوچە گەشتیارییەكانی هەرێمی كوردستان دەكەن.
بەپێی داتاکانی دەستەی گەشتوگوزار، لە ساڵی 2023، سێ ھەزار و سەد شوێن ھەبوون کە خزمەتگوزاریی گەشتیاری پێشکەش دەکەن کە بنکەی گەشتیاری، ھۆتێل، ڕێستۆرانت، مۆتێل، کافەتریا، ھۆڵی ئاھەنگگێڕان و شوێنە گەشتیارییەکانی دیکە دەگرێتەوە.
ھەزار و 75 شوێنی مانەوەی گەشتیاران ھەن کە بریتین لە 625 ھۆتێل، 370 مۆتێل، 80 گوندی گەشتیاری، جگە لە نزیکەی 800 ڕێستۆرانت و کافەتریای گەشتیاری و سەدان کەپری گەشتیاری لە ناوچە گەشتیارییەکان.
بەوەش زیاتر لە ملیۆنێک و 700 هەزار گەشتیار لە ماوەی چوار مانگی یەکەمی ساڵی 2024 هاتوونەتە هەرێمی کوردستان.