ئێوارەی ئەمڕۆ یەكشەم محەمەد شیاع سوودانی سه رۆك وه زیرانی عێراق سەرپەرشتی کۆبوونەوەیەکی تایبەتی لەگەڵ لایەنە سیاسییە براوەکانی هەڵبژاردنی ئەنجوومەنی پارێزگای کەرکووک كردووە و داوای كردووە لە گفتوگۆكان بۆ رێككەوتن بەردوامبن بە مەبەستی پاراستنی ئاشتی كۆمەڵایەتی لە پارێزگاكەدا.
نووسینگەی راگەیاندنی ئەنجوومەنی وەزیران سەبارەت بە ناوەڕۆكی كۆبوونەوەكە رایگەیاند "رێککەوتن کراوە بۆ بەردەوامی گفتوگۆى نێوان لایەنە سیاسییەكان تاكو لە ماوەى دوو هەفتەی داهاتوودا بگەنە رێككەوتن لەسەر دیاریكردنی پارێزگاری نوێ و سەرۆكی ئەنجوومەنی پارێزگا".
راشیگەیاند "سەرۆك وەزیرانی عێراق لە كۆبوونەكەدا جەختی كردۆتەوە كە پێویستە بەردەوامی بە گفتوگۆی نێوان لایەنە سیاسییەكان لەپێناو پاراستنی ئاشتی كۆمەڵایەتی لە كەركووك بێت.
هەروەها رایگەیاند "لە كۆبوونەوەكەدا رێككەوتن لەسەر چەند خاڵێكی تریش كراوە، لەوانە پێكهێنانی هاوپەیمانییەك بۆ ئیدارەی كەركووك لەنێوان سەرجەم لایەنە براوەكانی هەڵبژاردن".
ئەم كۆبوونەوەیە لەكاتێكدایە كە دوای تێپەڕبوونی نزیكەی سێ مانگ لە بەڕێوەچوونی هەڵبژاردنی ئەنجوومەنی پارێزگاكانی عێراق، تا ئێستا لایەنە سیاسییەكانی كەركووك لەسەر دیاریكردنی پارێزگارێكی نوێ و سەرۆكی ئەنجوومەنی پارێزگا رێك نەكەوتوون.
کۆمێنت (0)
تا ئێستا هیچ کۆمێنتێک نەکراوە.