وەزارەتی نەوتی عێراق : داهاتی مانگی رابردوو زیاتر لە 8 ملیار دۆلار بووە

ئەمڕۆ چوارشەممە وەزارەتی نەوتی عێراق ڕایگەیاند، داهاتی مانگی ڕابردوو زیاتر لە هەشت ملیار دۆلار بووە.
وەزارەتەكە لە بەیاننامەیەكدا ڕایگەیاندووە، كۆی هەناردە و داهاتی بەدەست هاتوو بۆ مانگی كانوونی یەكەمی رابردوو، بەپێی ئامارە سەرەتاییەكانی كۆمپانیای بەبازاڕكردنی نەوتی عێراقی (سۆمۆ) زیاتر لە هەشت ملیار دۆلار بووە، بەو پێیەی كۆی گشتی هەناردەكردنی نەوتی خاو گەیشتووەتە (108) ملیۆن و (56) هەزار و (590) بەرمیل، داهاتەكەشی بڕی (8) ملیار و (316) ملیۆن دۆلار بووە.
ئاماژەی بەوەشدا، كۆی ئەو بڕە نەوتە خاوەی لە كێڵگە نەوتییەكانی ناوەڕاست و باشووری عێراقەوە هەناردەكراوە، بڕی (107) ملیۆن و 592) هەزار و (532) بەرمیل بووە، هاوكات بڕی هەناردەكراو بۆ ئوردن گەیشتووەتە ( 464) هەزار و (58) ) بەرمیل.
ئاماژەی بەوەشكردووە، تێكڕای بڕی هەناردەكراوی ڕۆژانە گەیشتووەتە (3) ملیۆن و 486 هەزار بەرمیل لە ڕۆژێكدا، لەكاتێكدا تێكڕای نرخی یەك بەرمیل نەوتیش گەیشتووەتە 76 دۆلار و 69 سەنت.