نێچیرڤان بارزانی : هیوای ساڵێكی پڕ لە ئارامی و خۆشی و سەركەوتن بۆ هەمووان دەخوازم

نێچیرڤان بارزانی، سەرۆكی هەرێمی كوردستان بەبۆنەی ساڵی تازەی زایینی پەیامێكی بڵاوكردەوە كە ئەمە دەقەكەیەتی ..
ساڵی تازەی زایینی (2024) لە خانەوادەی سەربەرزی شەهیدان، پێشمەرگە قارەمانەكان، هێزەكانی ناوخۆ و تەواوی كوردستانییان بە هەموو پێكهاتەكانییەوە لە هەر كوێ بن، لە گەلانی عێراق و جیهان بەگشتی پیرۆز دەكەم. هیوای ساڵێكی پڕ لە ئارامی و خۆشی و سەركەوتن بۆ هەمووان دەخوازم.
بەهۆی لێكەوتەكانی دۆخی سیاسی، ئەمنی، ئابووری و كێشە و قەیرانەكانەوە‌ لە ناوچەكە و عێراق و هەرێمی كوردستان، ساڵێكی سەختمان بەڕێكرد كە تیایدا ڕووبەڕووی چەندین مەترسی و ئاڵنگاری بووینەوە.
ناتەبایی و ناكۆكیی سیاسیی ناوخۆ، ڕەنگدانەوەی خراپی بەسەر توانا و پێگەی كوردستانەوە لە عێراق و دەرەوە هەبوو. بووە هۆی ئەوەی هەرێمی كوردستان نەتوانێت وەك پێویست ماف و شایستە دەستوورییەكانی بەدەست بهێنێت. هەڵبژاردنی پەرلەمانی كوردستان دوا خرا، لە هەڵبژاردنی ئەنجومەنی پارێزگاكانیشدا لە ناوچەكانی مادەی (140) كاریگەرییە خراپەكانی، دیار بوون.
پێچەوانەی ڕێككەوتنە سیاسییەكان و دەستوور، وێڕای هەموو گفتوگۆ و هەوڵ و پابەندییەك، زۆرێك لە ماف و شایستە دەستوورییەكانی هەرێمی كوردستان لە عێراق فەراهەم نەبوون. چەندین جار بە هێرش و پەلاماری درۆنی، هەڕەشە لە ئارامی و سەقامگیریی هەرێمی كوردستان كرا.
جێبەجێنەكردنی ڕێككەوتنە سیاسییەكان و نەناردنی شایستە و مافە دەستوورییەكانی هەرێمی كوردستان، جگە لە زیان هیچ سوودێكی دیكە بە عێراق ناگەیەنێت. لە عێراق و هەرێمی كوردستان دەبێ هەمووان بە گیانی بەرپرسیاریەتیی هاوبەش، بە یەكترقبووڵكردن و تەبایی، بە گفتوگۆ و لێكگەیشتن، كار بۆ چارەسەركردنی كێشەكان و تێپەڕاندنی قەیرانەكان بكەین.
با لە ساڵی تازەدا‌ لە عێراق و هەرێمی كوردستان، پەند و وانە لە ڕابردوو وەرگرین و پێكەوە بەرەو داهاتوویەكی باشتر و سەقامگیر و ئاسوودە هەنگاو بنێین. با قەیران و ئاڵنگارییەكان بكەینە دەرفەت و بەرژەوەندیی گەل و نیشتمان، ئامانج و كۆكەرەوەی هەمووان بێت. عێراق بە پێكهاتەكانییەوە بەهێز و دەوڵەمەندە و تەنیا بە تەبایی و پێكەوەیی، هەمووان براوەن.
لەم بۆنەیەدا دووپاتی دەكەینەوە كە هەرێمی كوردستان لەگەڵ وڵاتانی دراوسێ و ناوچەكە و جیهاندا، لەسەر بنەمای ڕێزلەیەكگرتن و بەرژەوەندیی هاوبەش، برەو بە پەیوەندییەكانی دەدات. وەك هەمیشە بە فاكتەری ئارامی و سەقامگیری و بە هاوبەشێكی‌ كارای كۆمەڵگەی نێودەوڵەتی و زێدی فرەیی و پێكەوەژیان دەمێنێتەوە. 
بە هیوا و ئومێدەوە لە داهاتوو دەڕوانین و ساڵی نوێ لە هەمووان پیرۆز بێت.
نێچیرڤان بارزانی
سەرۆكی هەرێمی كوردستان
2023/12/31