ده‌سته‌ی نیشتمانی هه‌ڵبژاردنه‌كانی میسڕ ئه‌مڕۆ دووشه‌م ئه‌نجامی كۆتایی هه‌ڵبژاردنی سه‌رۆكایه‌تی وڵاته‌كه‌ی بڵاو كرده‌وه و تێیدا ئه‌وه‌ی ڕاگه‌یاند كه عه‌بدولفه‌تاح سیسی سه‌ركه‌وتنێكی گه‌وره و بێ وێنه‌ی به‌ده‌ستهێناوه.
هه‌ڵبژاردنی سه‌رۆكایه‌تی میسڕ له‌نێوان 10 تا 12ی ئه‌م مانگه به‌ڕێوه چوو و ئه‌مڕۆ دووشه‌میش ده‌سته‌ی نیشتمانی هه‌ڵبژاردنه‌كان له كۆنگره‌یه‌كی رۆژنامه‌وانیدا ئه‌نجامی كۆتایی هه‌ڵبژاردنه‌كانی بڵاو كرده‌وه.
به‌گوێره‌ی ئه‌نجامی هه‌ڵبژاردنه‌كان، عه‌بدولفه‌تاح سیسی سه‌ركه‌وتنی گه‌وره‌ی به‌ده‌ستهێناوه و بۆ سێیه‌مجار له‌سه‌ریه‌ك به سه‌رۆكی ئه‌و وڵاته تاكو ساڵی 2030 هه‌ڵبژێردرایه‌وه، دوای به‌ده‌ستهێنانی 39 ملیۆن و 702 هه‌زار و 451 ده‌نگ كه ده‌كاته ڕێژه‌ی 89.6%ی كۆی گشتی ڕێژه‌ی ده‌نگده‌ران.
ده‌سته‌كه ڕاشیگه‌یاند كه ڕێژه‌ی ده‌نگدانی ئه‌مجاره‌ی هه‌ڵبژاردنه‌كان له وڵاتی میسڕ بێ وێنه و پێوانه‌یی بووه له مێژوودا و هه‌روه‌ها كه‌مترین سه‌رپێچی و یاساشكێنیشی تێدا ئه‌نجامدراوه.
به‌گوێره‌ی داتاكانی ده‌سته‌كه له هه‌ڵبژاردنه‌كانی ئه‌مجاره‌ی وڵاتی میسڕ 44 ملیۆن و 777 هه‌زار و 668 كه‌س ده‌نگیان داوه كه ده‌كاته ڕێژه‌ی 66.6%ی كۆی گشتی ده‌نگدان.
کۆمێنت (0)
تا ئێستا هیچ کۆمێنتێک نەکراوە.