وەزیرێكی ئیسرائیل داوای لەسێدارەدانی دیلە فەلەستینییەكان دەكات

وەزیری كەلەپوور لە حكومەتی ئیسرائیل، ئەمیحای ئەلیاهۆ، داوای لەسێدارەدانی دیلەكانی فەلەستینی كرد بۆ ئەوەی دواتر لەژێر دانووستاندا ئازاد نەكرێن.
ئەلیاهۆ گوتی: دەبێت تیرۆریستان لە مەیدان لەسێدارە بدەین، ئێمە دەوڵەتی یاساین، بەڵام پێویستە بەپەلە ئەو تیرۆریستانە ڕەوانەی لای خودا بكەین، بۆ ئەوەی بە گرێبەست ئازاد نەكرێن.
ئەم بانگەوازەی وەزیرە توندڕەوەكەی ئیسرائیل لە میانی چاوپێكەوتنێكدا بوو لەگەڵ ماڵپەڕی یەدیعوت ئەحرەنوت.
ئەلیاهۆ سەر بە پارتی ڕاستڕەوی توندڕەوی " جوولەكە"یە، كە لەلایەن ئیتمار بن گەڤیر، وەزیری ئاسایشی نیشتمانی ئێستای حكومەتی ئیسرائیل، سەرۆكایەتی دەكرێت.