كۆریای باكوور هۆشداریی دەداتە ئەمریكا 

ئەمڕۆ شەممە كۆریای باكوور ڕایگەیاند كە هەر دەستوەردانێك لە ئۆپەراسیۆنەكانی پەیوەست بە مانگە دەستكردەكانی، بە ڕاگەیاندنی شەڕ دەزانێت و ئەگەر هەر هێرشێك بۆ سەر بەژەوەندییە ستراتیژییەكانی نزیك ببێتەوە، بە هێزی سەربازی وەڵام دەداتەوە.
ئاژانسی هەواڵی ناوەندی كۆریای باكوور بە پشتبەستن بە لێدوانێكی گوتەبێژی وەزارەتی بەرگری كۆریای باكور ڕایگەیاند كە پیۆنگ یانگ وەڵامی هەر دەستوەردانێكی ئەمریكی لە بۆشایی ئاسمان دەداتەوە .
لە بەیاننامەكەدا هاتووە: ئەگەر ئەمریكا هەوڵی دەستوەردان لە مافەكانی نەتەوەیەكی خاوەن سەروەری وەك چەكێك  بۆ سەر تەكنەلۆژیای پێشكەوتووی وڵاتەكەی بدات ، ئێمە مافەكانی خۆمان بە پێی یاسا نێودەوڵەتی و ناوخۆییەكان بەكاردەهێنین بۆ سنوورداركردنی توانای مانگە دەستكردە سیخوڕییەكانی ئەمریكا.
هەفتەی ڕابردوو كۆریای باكور بە سەركەوتوویی یەكەم مانگی دەستكردی سیخوڕی خۆی هەڵدا، كە بە وتەی خۆی مەبەست لێی چاودێریكردنی جموجۆڵە سەربازییەكانی ئەمریكا و كۆریای باشوورە.