وه‌زیری به‌رگریی فه‌ره‌نسا له‌میانه‌ی دیداره‌كه‌ی ئێواره‌ی ئه‌مڕۆ له‌گه‌ڵ سه‌رۆكی هه‌رێمی كوردستان جه‌ختی كرده‌وه‌كه ئه‌وان وه‌ك فه‌ره‌نسا پابه‌ندن له به‌رده‌وامی پشتگیری سه‌ربازی بۆ هه‌رێمی كوردستان و عێراق.
ئێواره‌ى ئه‌مڕۆ هه‌ينى نێچيرڤان بارزانى سه‌رۆكى هه‌رێمى كوردستان له‌گه‌ڵ شاندێكى ياوه‌رى له پاريس، له‌گه‌ڵ سێباستيان لوكۆرنو وه‌زيرى به‌رگريى فه‌ره‌نسا كۆبووه‌وه.
له كۆبوونه‌وه‌كه‌دا نێچيرڤان بارزانى سوپاس و پێزانينى بۆ پشتيوانى و هاريكاريى سه‌ربازى و ئه‌منيى فه‌ره‌نسا بۆ عێراق و هه‌رێمى كوردستان ده‌ربڕى و ئاماژه‌ى به ڕۆڵى كاريگه‌ر و قوربانيى هێزه‌كانى فه‌ره‌نسا له چوارچێوه‌ى هاوپه‌يمانيى نێوده‌وڵه‌تيى دژى داعشدا كرد. هه‌روه‌ها پرسه و سه‌ره‌خۆشى ئاراسته‌ى خانه‌واده‌ى ئه‌و سه‌ربازه فه‌ره‌نسيیانه كرد كه ئه‌م دواييه له ڕووداوێكدا له عێراق گيانيان له‌ده‌ست دا.
لاى خۆيه‌وه وه‌زيرى به‌رگريى فه‌ره‌نسا وێڕاى ده‌ربڕينى پێزانين بۆ ڕۆڵ و قوربانييه‌كانى پێشمه‌رگه له تێكشكاندنى داعش و به‌ره‌نگاربوونه‌وه‌ى تيرۆردا، جه‌ختى له پابه‌ندى و به‌رده‌واميى پشتگيريى سه‌ربازيى وڵاته‌كه‌ى بۆ عێراق و هه‌رێمى كوردستان كرده‌وه و ئاماده‌ييى وڵاته‌كه‌ى بۆ فراوانكردنى هاريكاريى هاوبه‌ش له‌چوارچێوه‌ى ڕێككه‌وتنى ستراتيژيى عێراق و فه‌ره‌نسا له بوارى سه‌ربازى و ئه‌منيدا دووپات كرده‌وه.
له كۆبوونه‌وه‌كه‌دا كه سوپاسالارى فه‌ره‌نسا و ژماره‌يه‌ك له پله‌دارانى سه‌ربازى ئاماده بوون، هه‌ردوولا دوايين پێشهاته‌كانى دۆخى ئاڵۆزى ڕۆژهه‌ڵاتى ناوه‌ڕاستيان تاوتوێ كرد و جه‌ختيان له گرینگيى هه‌وڵه‌كان بۆ ڕێگرى له ته‌شه‌نه‌سه‌ندنى زياترى شه‌ڕ كرده‌وه، هه‌روه‌ها هاوڕابوون له‌وه‌ى پێويسته عێراق و وڵاتانى ناوچه‌كه نه‌بنه به‌شێكى ئاڵۆزييه‌كان.
له ته‌وه‌رێكى ديكه‌ى كۆبوونه‌كه‌دا به‌ره‌وپێشچوونى هاريكارى و هه‌ماهه‌نگيى پێشمه‌رگه و سوپاى عێراق و مه‌ترسييه‌كانى داعش له‌سه‌ر ئارامى و سه‌قامگيريى عێراق و سووريا و چه‌ند پرسێكى ديكه‌ى جێى بايه‌خى هه‌ردوولا، خرانه به‌ر باس.
دواى كۆبوونه‌وه‌كه‌ش نێچيرڤان بارزانى له تۆمارى يادگاريى وه‌زاره‌تدا، په‌يامێكى ياده‌وه‌رى تۆمار كرد و تيايدا سوپاسى پشتگيرى و هاريكاريى هاوبه‌شى فه‌ره‌نسا له‌گه‌ڵ عێراق و هه‌رێمى كوردستان كرد.
کۆمێنت (0)
تا ئێستا هیچ کۆمێنتێک نەکراوە.