وەزارەتی شارەوانی و گەشتوگوزاری هەرێمی کوردستان ئاماژەی بەوە داوە کە 10 هەزار و 242 زەوی دیکە تاپۆ دەکرێن و لە سبەیەوە خاوەنزەوییەكان دەتوانن وێنەی تاپۆكانیان وەربگرنەوە.
ئەمڕۆ دووشەممە 16ـی 10ـی 2023 وەزارەتی شارەوانی و گەشتوگوزاری هەرێمی کوردستان ڕایگەیاند: لە چوارچێوەی پڕۆسەی تاپۆكردنی زەوییە كارتەكان لە سنووری سەرۆكایەتیی شارەوانیی هەولێر و بەڕێوەبەرایەتیی گشتیی شارەوانییەكانی هەولێر، 10242 كارتی دیکە لە هەولێر كارەكانیان تەواو كران و وێنەی تۆمار (تاپۆ)ـیان بۆ دەركراوە و لە سبەیەوە خاوەنزەوییەكان دەتوانن سەردانی فەرمانگە پەیوەندیدارەكانی شارەوانی بكەن بۆ وەرگرتنی وێنەی تۆماری زەوییەكانیان.
ڕاشیگەیاند: پڕۆسەی تاپۆكردنی زەویی كارت چەند ساڵێكە بەردەوامە و پێشتریش چەند هەزار پارچە زەویی دیكە وێنەی تۆماریان بۆ دەركراوە و ئێستاش لەلایەن بەڕێوەبەرایەتیی یەكەی گۆڕینی كارتی زەوی بۆ سەنەد لە وەزارەتی شارەوانی و گەشتوگوزارەوە بە هەماهەنگی لەگەڵ بەڕێوەبەرایەتییەكانی تۆماركردنی خانووبەر و فەرمانگە و لایەنە پەیوەندیدارەكان (10242) كارتی دیكە كارەكانیان تەواو كراون و وێنەی تۆماریان ئامادەن و خاوەنزەوییەكان دەتوانن لە سبەیەوە سەردانی شارەوانی بكەن بۆ وەرگرتنی وێنەی تۆماری زەوییەكانیان.
وەزارەتی شارەوانی ئاماژەی بەو شوێنانە داوە کە ئەو 10 هەزار و 242 زەوییەی دیکەی تاپۆ دەکرێن، بەمشێوەیە:-
- (1600) كارت لە كانی قڕژاڵە.
- (220) كارت لە كەرتی 92ـی شاوێس.
- (1800) كارت لە گڕەسۆری نوێ لەناو نەخشەی كەرتی باغمرەشەهاب.
- (590 ) كارت لە عرب كندی.
- (4332) كارت لە گوندی كۆری.
- (600) كارت لە قەرەچناغە لەناو نەخشەی كەرتی باغمرەشەهاب.
- (1100) كارت لە گەڕەكی قەڵاتی نوێ لە سنووری بنەسڵاوە.
کۆمێنت (0)
تا ئێستا هیچ کۆمێنتێک نەکراوە.