ئێواره‌ی ئه‌مڕۆ یه‌كشه‌م مسته‌فا كازمی سه‌رۆك وه‌زیرانی عێراق په‌یوه‌ندییه‌كی ته‌له‌فۆنی له‌لایه‌ن ئه‌نتۆنی بلینكن وه‌زیری ده‌ره‌وه‌ی ئه‌مه‌ریكا پێگه‌یشتووه.
بلینكن له په‌یوه‌ندییه ته‌له‌فۆنییه‌كه‌دا تووڕه‌بوون و دڵگرانی خۆی ده‌ربڕیوه بۆ هه‌وڵه ترسنۆكه‌كه‌ی سه‌ر سه‌رۆك وه‌زیرانی عێراق و به ده‌ستدرێژی سه‌ر هه‌موو عێراق و سه‌روه‌رییه‌كه‌ی ناوبردووه نه‌ك ته‌نیا بۆ سه‌ر سه‌رۆك وه‌زیران.
وه‌زیری ده‌ره‌وه‌ی ئه‌مه‌ریكا هه‌روه‌ها ستایشی ڕۆلی كازمی كردووه له شێوازی به‌ڕێوه‌بردنی وڵات و ئه‌و ئازایه‌تییه‌ی كه هه‌یه‌تی بۆ ڕووبه‌ڕووبوونه‌وه‌ی دۆخه سه‌خته‌كان كه ڕووبه‌ڕووی وڵات ده‌بێته‌وه و هه‌ڕه‌شه له ته‌ناهی و سه‌قامگیرییه‌كانی ده‌كات.
كازمی و بلینكن له په‌یوه‌ندییه ته‌له‌فۆنییه‌كه‌دا هه‌روه‌ها جه‌ختیان له به‌رده‌وامی پته‌وكردنی په‌یوه‌ندییه‌كانی نێوان هه‌ردوو وڵات كردۆته‌وه بۆ به‌رژه‌وه‌ندی گه‌له‌كانیان.
جێی باسه به‌ره‌به‌یانی ئه‌مڕۆ یه‌كشه‌م به 3 درۆن هێرشكرایه سه‌ر ماڵی مسته‌فا كازمی سه‌رۆك وه‌زیرانی عێراق و هه‌وڵی تیرۆركردنی درا و به‌هۆیه‌وه چه‌ند پاسه‌وانێكی بریندار بوون، سه‌رۆك وه‌زیرانی عێراقیش جه‌ختی كرده‌وه كه ئه‌و سه‌لامه‌ته.
کۆمێنت (0)
تا ئێستا هیچ کۆمێنتێک نەکراوە.