به‌رێوه‌به‌ری گشتی ته‌ندروستی هه‌ولێر هۆشداری له ره‌وشی ئێستای تووشبوونی هاووڵاتیان به كۆڕۆنا ده‌دات و رایده‌گه‌ێنێت: باشترین چاره‌سه‌ر وه‌رگرتنی ڤاكسینه.
د.دڵۆڤان محه‌ممه‌د، به‌رێوه‌به‌ری گشتی ته‌ندروستی هه‌ولێر له میانی به‌شداری كردنی له‌رووماڵی ده‌نگوباسی كوردستان تیڤیدا رایگه‌یاند: تا ئێستا ره‌وشی كۆڕۆنا كۆنتڕۆڵ نه‌كراوه ، سه‌ردانی تووشبووان بۆ نه‌خۆشخانه‌كان به‌رده‌وامه.
راشیده‌گه‌ێنێت: باشترین چاره‌سه‌ر بۆ پارێزراوبوونی هاووڵاتییان له‌م په‌تایه وه‌رگرتنی ڤاكسینه ، گوتیشی: ئه‌و كه‌سانه‌ی ڤاكسینیان وه‌رنه‌گرتووه پێویسته هه‌فتانه پشكنینی كۆڕۆنابكه‌ن.
د.دڵۆڤان محه‌ممه‌د ئاماژه‌ی بۆ ئه‌وه‌شكرد: له ئێستادا ته‌مه‌نه‌كانی 12 بۆ 18 ساڵیش ده‌توانن ڤاكسین وه‌ربگرن .
به‌رێوه‌به‌ری گشتی ته‌ندروستی هه‌ولێر راشیگه‌یاند: پێویسته تا كۆتایی ئه‌م مانگه مامۆستایان به‌رێژه‌یه‌كی باش بچن بۆ وه‌رگرتنی ڤاكسین .
ئاماژه‌ی بۆ ئه‌وه‌شكرد، له ئێستادا چوونی مامۆستایان بۆ وه‌رگرتنی ڤاكسین كه‌می كردووه ، پێویسته بچن و پابه‌ندی رێككاره ته‌ندروستییه‌كانیش بن له پێناو پارێزراو بوونیان.
د.دڵۆڤان ئاماژه‌ی بۆ ئه‌وه‌شكرد: پێویسته به‌ستنی ماسك بكرێته ناچاری و هاووڵاتییان زیاتر پابه‌ندی رێككاره ته‌ندروستییه‌كان بن بۆ سه‌لامه‌تی خۆیان و ئه‌زیزانیان .
کۆمێنت (0)
تا ئێستا هیچ کۆمێنتێک نەکراوە.