بەشی رۆژنامەوانیی دەزگای رۆشنبیری و ڕاگەیاندنی پارتی دیموکراتی کوردستان وەڵامی عەتا سەراوی ئه‌ندامی سه‌ركردایه‌تی یه‌كێتی دەداتەوە و ده‌ڵێت "خۆنواندن له‌سه‌ر حسابی پارتی.. سه‌نعه‌تێكی هه‌رزان و به‌سه‌رچوو".
له‌به‌شێكی به‌یاننامه‌كه‌دا هاتووه "سه‌راوی به‌م تۆمه‌ت و قسه بێ بنه‌مایانه، ده‌یه‌وێت فه‌زیحه‌ت و تاوانی گه‌وره‌ی ژه‌هرخواردكردنی سه‌ركرده‌كانی یه‌كێتی له‌بیر خه‌ڵك به‌رێته‌وه".
هه‌روه‌ها هاتووه "ته‌نیا وه‌ڵامی ئێمە سه‌باره‌ت به‌و تۆمه‌ت و قسانه وه‌ك هه‌میشه پارتی و دامه‌زراوه‌كانی په‌نا بۆ یاسا ده‌به‌ن و ناوبراو ده‌ده‌نه دادگا جا با له‌وێ دیفاع له خۆی بكات".
ده‌قی به‌یاننامه‌كه‌ی بەشی رۆژنامەوانیی دەزگای رۆشنبیری و ڕاگەیاندنی پارتی دیموکراتی کوردستان:-
ئەم ئێوارەیە كه‌سێك به ناوی عه‌تا سه‌راوی ئه‌ندامی سه‌ركردایه‌تی یه‌كێتی به زمان و ئاستێكی نزمی ده‌ربڕین كه مه‌گه‌ر هه‌ر له عه‌تا خۆی و هاوشێوه‌كانی بووه‌شێته‌وه، چه‌ند تۆمه‌تێكی ناڕه‌وای خسته پاڵ پارتیمان و ھەڤاڵ مه‌سرور بارزانی ئه‌ندامی مه‌كته‌بی سیاسی پارتی و سه‌رۆكی حكوومه‌تی هه‌رێمی كوردستان.
ئه‌م چه‌ند دێڕه، وه‌ڵامی عه‌تا نییه، له‌به‌ر ئه‌وه‌ش نییه كه قسه بێسه‌روبه‌ره‌كانی بنه‌ما و كاریگه‌رییه‌كیان هه‌یه، یان هه‌ر له بنه‌مادا خۆی خاوه‌نی سه‌نگ و قورساییه‌ك بێت، به‌ڵكو بۆ ئه‌وه‌یه ببێته عیبره‌ت بۆ هه‌موو ئه‌وانه‌ی تا ئه‌مڕۆش پێیانوایه ده‌توانن به جنێو و تۆمه‌تبه‌خشینه‌وه به پارتی و سه‌ركرده‌كانی ده‌بنه شتێك و بازاڕیان گه‌رم ده‌بێته‌وه.
ئاشكرایه كه به‌م تۆمه‌ت و قسه بێ بنه‌مایانه، ناوبراو ده‌یه‌وێت فه‌زیحه‌ت و تاوانی گه‌وره‌ی ژه‌هرخواردكردنی سه‌ركرده‌كانی یه‌كێتی له‌بیر خه‌ڵك به‌رێته‌وه، دووریش نییه خۆی بۆ جێگرتنه‌وه‌ی ژه‌هرفرۆشه‌كان دانابێت، به‌ڵام با بزانێت نه‌ك هه‌ر جه‌ماوه‌ری پارتی، بگره خه‌ڵكی ناوچه‌كه‌ی خۆی باش ده‌زانن عه‌تا سه‌راوی كێیه و چییه و چه‌ندی له‌باردایه، بۆیه گه‌ڕانه‌وه‌ی بۆ سه‌ر سه‌نعه‌ته كۆنه هه‌رزانه‌كه‌ی په‌لاماردانی ناحه‌قی پارتی چه‌ند دادی خه‌ڵكانی دیكه‌ی داوه، هه‌ر هێنده‌ش دادی ئه‌و ده‌دات.
ته‌نیا وه‌ڵامی ئێمە سه‌باره‌ت به‌و تۆمه‌ت و قسانه وه‌ك هه‌میشه پارتی و دامه‌زراوه‌كانی په‌نا بۆ یاسا ده‌به‌ن و ناوبراو ده‌ده‌نه دادگا جا با له‌وێ دیفاع له خۆی بكات و تۆمه‌ته‌كانی بسه‌لمێنێت.
ڕه‌نگه خراپیش نه‌بێت گه‌ر له كۆتاییدا نه‌سیحه‌تێكی بكرێت: به‌خۆبادان و قسه‌ی نزم و ڕه‌فتاری نابه‌جێ كه‌س نه‌بووه‌ته پاڵه‌وان و ناشبێت، ئه‌و جۆره له قسه‌كردن و تۆمه‌تبه‌خشینه‌وه‌یه، ئه‌و هه‌ڕه‌شه و په‌نجه ڕاوه‌شاندنه نه‌ك هه‌ر باویان نه‌ماوه و كه‌س باوه‌ڕیان پێناكات، بگره خه‌ڵك به خۆنواندن و دواكه‌وتوویی ده‌زانن و گاڵته‌یان پێدێت.
کۆمێنت (0)
تا ئێستا هیچ کۆمێنتێک نەکراوە.