وەزارەتی کارەبا: زیاتر لە ملیۆنێک پێوەری زیرەکی کارەبا بەستراون

وەزارەتی کارەبای هەرێمی کوردستان ڕایگەیاند، زیاتر لە ملیۆنێك پێوەری زیرەکی کارەبا لە سەرانسەری هەرێمی کوردستان بەستراوە و بەهۆیەوە توانراوە سێ کاتژمێر و نیو ماوەی پێدانی کارەبا زیاد ببێت.

کامیل قەزاز بریکاری وەزارەتی کارەبای هەرێمی کوردستان ئەمڕۆ دووشەممە ڕایگەیاند: زیاتر لە ملیۆنێک و 21 هەزار پێوەری زیرەک لە سەرانسەری هەرێمی کوردستان بەستراون، بڕی ملیۆنێک و500  هەزاری تریش بە بڕی 253 ملیۆن دۆلار بۆ هاوبەشانی کارەبا دابین کراوە.

کامیل قەزاز ڕاشیگەیاند: تا ئێستا وه‌ك قۆناغی یەکەم 350 هەزار پێوەری زیرەک بە پرۆسەی لینکینگ بەگەڕ خراون و بە پێی ئەم پێوەرە کارەبای هاوبەشان دەخوێندرێتەوە، هەروەها ئەمساڵ بەشی هاردوێری پرۆژەکە (بەستنی پێوەرکان) تەواو دەبێت و لە ساڵی ئایندەش بەشی سۆفت وێرەکەی (بەگەڕخستنی پێوەرەکان) تەواو دەبێت.

هەروەها رایگەیاند: بە هۆی پێوەری زیرەکەوە کارەبا کۆنترۆڵ دەکرێت و سەرپێچی بۆ سەر تۆڕەکانی کارەبا چارەسەر دەبێت، بۆ خوێندنەوەی پێوەری کارەباش ناچینە ناو ماڵان و مانگانە پسولەی کارەبا چاپ دەکرێت و دەدرێتە هاوبەشانی کارەبا، هەروەها گۆڕەڕەکانی کارەبا بە تایبەتی لە زستاندا لە سووتان و دەستکاریکردن دەپارێزرێن و توانای سنووردارکردنی بڕی پێدانی ئەمپێری کارەبا هەیە.

بریکاری وەزارەتی کارەبای هەرێمی کوردستان ڕاشیگەیاند: ژێرخانی بەرهەمهێنانی کارەبای هەرێم 6 هەزار و 900 مێگاواتە، بەڵام بە هۆی نەبوونی سووتەمەنی 3 هەزار و 500  تا 3 هەزار و 800 بەرهەم دێنین.

جه‌ختیشی كرده‌وه‌ كه‌ سێ سەعات و نیو ماوەی پێدانی کارەبایان زیاتر کردووە و لەنێوان 17-18 کاتژمێر کارەبا دراوە و هەوڵیش دەدەن لە وەرزی زستان لەسەر ئەم باشبوونەی دۆخی کارەبا بەردەوام بن.