قۆناغى یه‌که‌مى جێبه‌جێکردنى جووتسایدى ڕانیه‌ بۆ دووکان له‌ ته‌واوبووندایە

ئه‌مساڵ قۆناغى یه‌که‌مى پڕۆژه‌ى جووتسایدى ڕانیه‌ بۆ دووکان ته‌واو ده‌کرێت که‌ درێژییه‌که‌ى زیاتر له‌ 18 کیلۆمه‌تره‌. 

به‌ختیار ئه‌حمه‌د، به‌ڕێوه‌به‌رى ئاوه‌دانکردنه‌وه‌ى ڕانیه‌، رایده‌گه‌ێنێت: پڕۆژه‌ى جووتسایدى چوارقوڕنه‌ بۆ دووکان له‌ سێ قۆناغ پێک هاتووه‌. %95ى کاره‌کانى قۆناغى یه‌که‌مى جووتسایدی‌ چوارقوڕنه‌ بۆ دووکان ته‌واو بووه‌ که درێژییه‌که‌ی‌ 18 کیلۆمه‌تر و نیوە، ئه‌وه‌ى ماوه‌ ته‌نها هێڵکارى و دانانى هێماکانى هاتوچۆیه و‌ کۆى گشتیى بودجه‌ى پڕۆژه‌که‌ش زیاتر له‌ 150 ملیار دینار ده‌بێت.

به‌ڕێوه‌به‌رى ئاوه‌دانکردنه‌وه‌ى ڕانیه‌ ده‌شڵێت: بۆ ته‌واوکردنى قۆناغى یه‌که‌م که‌ جووتسایدى چوارقوڕنه – دووکانه،‌ ئێستا بڕى شه‌ش ملیار دیناری دیکه‌مان پێوسته‌. بۆ ئه‌وه‌ش نووسراومان کردووه‌ و چاوه‌ڕێى حکوومه‌تین، کۆى بودجه‌ى ته‌رخانکراویش بۆ ئه‌م به‌شه‌ تا ئێستا 52 ملیار دینار بووه‌.

هه‌روه‌ها راشیده‌گه‌ێنێت: قۆناغى دووه‌مى پڕۆژه‌که‌ له‌ هیزۆپ بۆ خه‌له‌کانه‌، ئه‌ویش ئێستا‌ 50%ى کاره‌کانى ته‌واو بووه‌ و کارکردن تێیدا به‌رده‌وامه‌، له‌ ڕابردوودا حکوومه‌تى هه‌رێم به‌ چه‌ند قۆناغێک بودجه‌ى بۆ ته‌رخان کردووە و خۆشبه‌ختانه‌ ئێستا ڕێکاره‌کانى بۆ ته‌واو کراوه‌.

به‌ختیار ئه‌حمه‌د به‌ڕێوه‌به‌رى ئاوه‌دانکردنه‌وه‌ى ڕانیه‌ ئاماژه‌ بۆ ئه‌وه‌شده‌كات: بۆ ته‌واوکردنى سه‌رجه‌م بڕگه‌کانى قۆناغى یه‌که‌می ڕێگاکه‌ پێویستمان به‌ 6 ملیارى دیکه‌ هه‌یه،‌ بۆ ئه‌وه‌ش نووسراومان کردووه‌ و چاوه‌ڕێى حکوومه‌تین، به‌ڵام به‌ هه‌موو پێوه‌ره‌کان له‌ ئاینده‌یه‌کى نزیکدا قۆناغى یه‌که‌مى شه‌قامه‌کە به ‌ته‌واوى ئاماده‌کارییه‌کانییەوە به‌ ڕووى هاتوچۆى هاووڵاتیان و شۆفێراندا دەکرێتەوە.