سەرۆک بارزانی بەبۆنەی سەرکەوتنی کاندیدەکانی پارتی دیموکراتی کوردستان لە پارێزگای نەینەوا و دەڤەری شنگال، په‌یامێك ئاراسته‌ی جه‌ماوه‌ری پارتی له ناوچه‌كه كرد.
سه‌رۆك بارزانی له په‌یامه‌كه‌دا هه‌روه‌ها پیرۆزبایی لە ئەندام و لایەنگران و ڕێکخستنەکانی لقی 17 و 14ی پارتی كرد.
سه‌رۆك بارزانی ڕایگه‌یاند: سوپاس و پێزانینی تایبەتم هەیە بۆ خۆڕاگری جەماوەری دەشتی نەینەوا و دەڤەری شنگال و خوشک و برا ئێزیدییەکان و پێکهاتەکانی تر کە وەڵامی هەڵوێست و قوربانیدانی پارتیان دایەوە.
ده‌قی په‌یامه‌كه‌ی سه‌رۆك بارزانی:-
بەناوی خودای مەزن و دلۆڤان
بەبۆنەی سەرکەوتنی کاندیدەکانی پارتی دیموکراتی کوردستان لە پارێزگای نەینەوا و دەڤەری شنگال، پیرۆزبایی لە ئەندام و لایەنگران و ڕێکخستنەکانی لقی ۱۷ و لقی ۱٤ی پارتی دیموکراتی کوردستان دەکەم. دەستخۆشی ماندووبوون و پابەندبوونیان لێ دەکەم کە بوونە هۆی سەرخستنی پارتی لە هەڵبژاردنی ئەنجوومەنی نوێنەرانی عێراق لەم دەڤەرەدا.
هەروەها سوپاس و پێزانینی تایبەتم هەیە بۆ خۆڕاگری جەماوەری دەشتی نەینەوا و دەڤەری شنگال و خوشک و برا ئێزیدییەکان و پێکهاتەکانی تر کە وەڵامی هەڵوێست و قوربانیدانی پارتیان دایەوە، و پەیامێکی روون و ئاشکراشیان دا بە هەموو لایەک کە ئەوان کێیان دەێت و چیان دەوێت.
دڵنیاشیان دەکەمەوە کە پارتی لەگەڵ کۆتایهێنانی ئازار و نەهامەتی خەڵکی ئەم ناوچانە دایە و، وەک هەمیشە پاڵپشت و پارێزەری ماف و ژیان و سەربەرزییان دەمێنێتەوە.
مسعود بارزانی
17ی تشرینی یەکەمی 2021
کۆمێنت (0)
تا ئێستا هیچ کۆمێنتێک نەکراوە.