كۆمیسیۆنی باڵای سه‌ربه‌خۆی هه‌ڵبژاردنه‌كان جه‌ختی كرده‌وه دوای ته‌واوبوونی پڕۆسه‌ی ده‌نگدانی گشتی له 10/10/2021، له ماوه‌ی 24 كاتژمێردا ئه‌نجامی هه‌ڵبژاردنه‌كان ئاشكرا ده‌كه‌ین و بۆ ڕای گشتی ڕای ده‌گه‌یه‌نین.
داود سه‌لمان خزه‌یر به‌ڕێوه‌به‌ری پڕۆسه و مه‌شقه‌كان له كۆمیسۆنی باڵای سه‌ربه‌خۆی هه‌ڵبژاردنه‌كان ڕایگه‌یاند: دوای ته‌واوبوونی پڕۆسه‌ی هه‌ڵبژاردنی گشتی له كاتژمێر 6ی ئێواره‌ی ڕۆژی یه‌كشه‌م، زانیاری سه‌رجه‌م وێستگه و بنكه‌كان له هه‌موو عێراق به ڕێگه‌ی هه‌ژماری ئه‌لیكترۆنی ده‌گه‌نه‌وه بنكه‌ی سه‌ره‌كی كۆمیسۆن.
هه‌روه‌ها ڕایگه‌یاند: دوای گه‌یشتنی زانیارییه‌كان، له ماوه‌ی 24 كاتژمێردا ئه‌نجامی به‌رایی هه‌ڵبژاردنه‌كان ڕاده‌گه‌یه‌نرێ.
به‌ڕێوه‌به‌ری پڕۆسه و مه‌شقه‌كانی كۆمیسیۆن ڕاشیگه‌یاند: ئه‌گه‌ر سكاڵا و تانه له هه‌ر بنكه‌یه‌ك هه‌بێت، دوای بڕیاردانی ئه‌نجوومه‌نی كۆمیسۆن سندوقی ئه‌و بنكه‌یه ده‌كرێته‌وه و به‌ڕێگه‌ی هه‌ژماركردنی ده‌ستی دووباره پێداچوونه‌وه و هه‌ژماری بۆ ده‌كرێته‌وه.
كۆمیسیۆنی باڵای سه‌ربه‌خۆی هه‌ڵبژاردنه‌كان ئاشكرای كرد كه هاووڵاتییان له ڕۆژی یه‌كشه‌م له ماوه‌ی 12 كاتژمێر ده‌توانن به ئازادانه ده‌نگ بده‌ن.
كۆمیسیۆن هه‌روه‌ها ڕایگه‌یاندبوو: یه‌كشه‌می داهاتوو پڕۆسه‌ی ده‌نگدانی گشتی له سه‌رجه‌م بنكه‌كانی هه‌ڵبژاردن له هه‌موو پارێزگاكانی عێراق به هه‌رێمی كوردستانیشه‌وه له كاتژمێر 7ی به‌یانی ده‌ست پێ ده‌كات و كاتژمێر 6ی ئێواره‌ی هه‌مان ڕۆژ كۆتایی دێت.
هه‌روه‌ها عیماد جه‌میل له ڕاگه‌یاندنی كۆمیسیۆنی باڵای سه‌ربه‌خۆی هه‌ڵبژاردنه‌كان ئاشكرای كردبوو: ده‌نگدانی تایبه‌ت له ڕۆژی هه‌ینی داهاتوو هاوشێوه‌ی هه‌ڵبژاردنی گشتی ده‌بێت، واته له كاتژمێر حه‌وتی به‌یانی بنكه‌كانی هه‌ڵبژاردن ده‌كرێنه‌وه و كاتژمێر 6ی ئێواره‌ش داده‌خرێن.
کۆمێنت (0)
تا ئێستا هیچ کۆمێنتێک نەکراوە.