له هه‌فته‌ی هه‌شته‌می خولی یانه‌كانی ئیسپانیاو له یاری لوتكه‌دا، كاتژمێر ده‌ی ئه‌م شه‌و به‌كاتی هه‌ولێر، یانه‌ی ئه‌تله‌تیكۆ مه‌درید پاڵه‌وانی وه‌رزی ڕابردووی خوله‌كه میوانداری یانه‌ی بارسێلۆنا ده‌كات.
یاریزانانی هه‌ردوو تیپ دوایین یه‌كه‌ی مه‌شقیان بۆ یاریه‌كه سازكرد، بارسێلۆنا له كاتێك ئه‌م یاریه ئه‌نجامده‌دات كه به بارودۆخێكی سه‌خت تێده‌په‌ڕێت.
له كۆی شه‌ش یاری ئه‌م وه‌رزه‌ی لالیگا تیپه كاتالۆنیه‌كه سێ یاری بردۆته‌وه‌و له سێ یاریش یه‌كسان بووه‌و یاریه‌كی دواخراوی ماوه، له چامپیۆنس لیگیش هه‌ردوو یاری گه‌ڕی یه‌كه‌م و دووه‌می قۆناغی كۆمه‌ڵه‌كانی به بایرن میونشن و به‌نفیكا دۆڕاندووه.
به‌مه‌ش ڕۆناڵد كۆمانی هۆڵه‌ندی و ڕاهێنه‌ری بارسا كه‌وتۆته ژێر فشارێكی توند، كۆمان به‌هۆی سزادانیه‌وه ناتوانێت له یاری ئه‌م شه‌و له نزیكه‌وه یاوه‌ری تیپه‌كه‌ی بكات، هاوكات كارگێڕی بارسا ڕایگه‌یاند كه پێدری ناوه‌ڕاستكاری لاوی یانه‌كه به‌هۆی پێكان به‌شداری له یاری به‌رامبه‌ر ئه‌تله‌تیكۆ ناكات.
بارسێلۆنا له كۆی شه‌ش یاری خاوه‌نی دوازده خاڵه‌و له پله‌ی شه‌شه‌می ڕیزبه‌ندی یانه‌كان دایه، له‌به‌رامبه‌ریشدا، ئه‌تله‌تیكۆ مه‌درید له كۆی حه‌وت یاری چوارده خاڵی كۆكردۆته‌وه‌و له پله‌ی چواره‌می ڕیزبه‌ندی دێت، له گه‌ڕی پێشووی خوله‌كه‌و له ئه‌نجامێكی چاوه‌ڕوان نه‌كراودا، ئه‌تله‌تیكۆ به گۆڵێكی بێ به‌رامبه‌ر به دیپۆرتیڤۆ ئالاڤێسی میوانداری دۆڕا.
ماتیوس كونهای به‌ڕازیلی و هێرشبه‌ری ئه‌تله‌تیكۆ به‌هۆی پێكان به‌شداری له‌م یاریه ناكات، هاوكات جیۆفری كۆندۆگبیای فه‌ڕه‌نسی و ناوه‌ڕاستكاری ڕۆخی بلانكۆس به‌هۆی ڕاگرتنه‌وه له یاریه‌كه داده‌بڕێ .
کۆمێنت (0)
تا ئێستا هیچ کۆمێنتێک نەکراوە.