ئەمڕۆ سێشەم، جوتیار عادل گوتەبێژی حکوومەتی ھەرێمی کوردستان و شاندی یاوەریان سەردانی دەروازەی نێودەوڵەتی حاجی ئۆمەرانیان کرد و لە لایەن بەڕێز مەسعوود باتێلی سەرپەرشتیاری دەروازەی نێودەوڵەتی حاجی ئۆمەران و بەرێوەبەران و بەرپرسانی گشت فەرمانگە و بنکەکانی دەروازە پێشوازی لێ کرا.
لە کۆبوونەوەیەکدا لەگەڵ سەرپەرشتیار و گشت بەرێوەبەر و بەرپرسانی دەروازەی حاجی ئۆمه‌ران، باس لە کاروباری بازرگانی و گەشتیاری و کوالیتی کاڵاکان و کرداری گواستنەوە و ڕێنماییەکانی وەزارەتەکان كرا.
هەروەها باس لە پێداویستییەکانی دەروازە و پرۆژەکانیان و پێشنیارەکانی پەیوەست بە پەرەپێدان و پێشخستنی بازرگانی و گەشتیاری لە ناو دەروازەی نێودەوڵەتی حاجی ئۆمەران کرا.
لە کۆبوونەوەكه‌دا گوتەبێژی حکوومەت ئامادەیی حکوومەتی هەرێمی کوردستانی نیشان دا بۆ بەدواداچوونی بابەتەکان و چارەسەرکردنی کێشە و گرفتەکان و دابینکردنی پێداویستییەکانیان بۆ باشتر بەرەوپێشچوونی جموجوڵی بازرگانی و گەشتیاری و کەمکردنی ڕۆتین و ئاسانکاریکردن لە چوارچێوەی یاسا و رێنماییەکانی وەزارەتە پەیوەندیدارەکان.
کۆمێنت (0)
تا ئێستا هیچ کۆمێنتێک نەکراوە.