گوته‌بێژی وه‌زاره‌تی ته‌ندروستی هه‌رێمی كوردستان ئاشكرای كرد، له‌سه‌ر فه‌رمانی سه‌رۆكی حكوومه‌تی هه‌رێمی كوردستان، ژماره‌یه‌ك ئۆتۆمبێڵی ته‌ندروستی بۆ به‌ڕێوه‌به‌رایه‌تی گشتیی ته‌ندروستی هه‌ڵه‌بجه دابین كرا.
دكتۆر ئاسۆ حه‌وێزی گوته‌بێژی وه‌زاره‌تی ته‌ندروستی ڕایگه‌یاند: بە فەرمانی بەڕێز مەسرور بارزانی سەرۆكی حكوومەتی هەرێمی كوردستان، ئەنجومەنی وەزیران ڕەزامەندی دەربڕی لەسەر دابینکردنی چوار ئۆتۆمبێڵ بۆ بەڕێوەبەرایەتی گشتیی تەندروستی هەڵەبجە.
هه‌روه‌ها ڕایگه‌یاند: ئۆتۆمبێڵه ته‌ندروستییه‌كان بریتین لە، 2 ئۆتۆمبێلی فریاکەوتن (ئەمبوڵانس) و 2 ئۆتۆمبێلی خزمەتگوزاری (پیکاب).
گوته‌بێژی وه‌زاره‌تی ته‌ندروستی زیاتر گوتی: ئۆتۆمبێڵه‌كان لە پێناو بەرژەوەندیی گشتی و زیاتر خزمەتکردنی هاووڵاتییان لە نەخۆشخانە و دامودەزگا تەندروستییەکانی سنووری پارێزگای هەڵەبجەی شەهید دابین كراوه.
دكتۆر ئاسۆ ڕاشیگه‌یاند: بە ناوی وەزارەتی تەندروستییه‌وه سوپاسی پاڵپشتی جەنابی سەرۆکی حکوومەتی هەرێمی کوردستان دەکەین بۆ بەردەوام فراوانکردنی خزمەتگوزارییەکانی تەندروستی لە پارێزگای هەڵەبجەی شەهید.
کۆمێنت (0)
تا ئێستا هیچ کۆمێنتێک نەکراوە.