شاندێکی پارتی بەشداری لە کۆنگرەی ساڵانەی پارتی سۆشیالیستی گەلی دانیمارک کرد

 لەسەر بانگهێشتی فەرمیی سەرکردایەتیی پارتی سۆشیالیستی گەلی دانمارکی، شاندێکی پارتی دیموکراتی کوردستان لە شاری کۆلدینگ لە دانیمارک لە ڕۆژانی نێوان 11 – 12سیپتەمبەری 2021 بەشدارییان لە کۆنگرەی ساڵانەی پارتی سۆشیالیستی گەلی دانیمارکیدا کرد و لەسەر ناوی پەیوەندییەکانی دەرەوەی پارتی دیمۆکراتی کوردستاندا پیرۆزبایینامەیەکیان ئاراستەی کۆنگرەکە کرد.                                                                                                                                                   

لە پیرۆزبایینامەی پەیوەندییەکانی دەرەوەی (پ.د.ک)دا بە ناوی ڕیزدار سەرۆک مەسعوود بارزانی و ئەندامانی مەکتەبی سیاسی و سەرکردایەتی لە کوردستانەوە هیوای سەرکەوتنیان بۆ کۆنگرەی ساڵانەی پارتی سۆشیالیستی گەلی دانمارک خواستووە و سەرکەوتنی بەرچاوی پارتی ناوبراو لە هەڵبژاردنەکانی پیشووی  پەرلەمانی ئەم وڵاتە و بەشداریی کارای ژمارەیەک لە چالاکوانانی سیاسیی کورد لە ڕیزەکانی ئەم پارتەدا کە تا ئاستی سەرکردایەتی ڕۆڵیان هەیە، بەرز نرخاندووە و هیوای گەشەپێدانی بەردەوام بۆ پارتی ناوبراو خۆشگوزەرانی و پێشکەوتنیان بۆ کۆمەڵگای دیموکراسیی دانیمارک لەسەر ئاستی ناوخۆیی و ئەورووپی و جیهانی لە بواری ئاشتی و سەقامگیری و دیموکراسی لەسەر ئاستی نیودەوڵەتی بە هیوا خواستووە.

لە بەشێکی تری پیرۆزبایینامەی پارتی دیموکراتی کوردستاندا بۆ کۆنگرەکەدا هاتووە: پارتی سۆشیالیستی گەلی دانمارک کە لە 15/2/1959 دامەزراوە، خاوەنی مێژوو و ئەزموونێکی سەرکەوتووە لە حوکمڕانی لە وڵاتی دانمارک و پەیوەندییەکی دۆستانەی بەهێز لە نێوان پارتی سۆشیالیستی گەل و (پ.د.ک) دا هەیە و ژمارەیەکی زۆر لە ئەندامان و چالاکوانانی سیاسیی کورد لە ڕیزی پارتی ناوبراو دا چاڵاکن و ڕەوەندی کوردستانی لە دانمارک توانیویانە بە باشترین شێوە خۆیان لەگەڵ  کۆمەڵگا و ژینگەی سیاسی وڵاتەکەیان دا بگونجێنن و سوودبەخش بن لە بوارە جیاجیاکان دا. لیژنەی ناوچەی (پ.د.ک) لە کۆپنهاگن هەروا پەیوەندییەکانی نێوای هەردوو پارتی بردۆتە ئاستێکی باشەوە. ئێمە لە کوردستانەوە هیوای سەرکەوتن بۆ کۆنگرەکەتان دەخوازین و داوا کراوە کە سەرکردایەتیی هەردوو پارتی دۆست بە هۆی بەهێزی پەیوەندییەکانی نێوانیانەوە هاوکار بن بۆ دروستکردنی پردێکی پەیوەندی بەهێزتر لە نێوان وڵاتی دانمارک و هەرێمی کوردستاندا و پارتی سۆشیالیستی گەل و پارتی دیموکراتی کوردستان هەوڵەکان چڕتر بکەینەوە بۆ ئاڵوگۆڕی شاند و برەودان بە دیدار و چاوپێکەوتنەکان بۆ خزمەتی پێشکەوتنی هەردوو گەلی دۆست.

لە کۆنگرەکەدا،  زانا ئەحمەد بە نوێنەرایەتیی پەیوەندییەکانی دەرەوەی (پ.د.ک) بەشداری کۆنگرەکە بوو و نوینەری پارتی سۆسیالیستی کوردستانی باکوور و چەند چالاکوانێکی سیاسیی کورد هەروا ئامادەی کۆنگرەکە بوون و چەندین دیدار و چاوپیکەوتنیان لە بەشی میوانانی نیودەوڵەتیدا لەگەڵ ئەندامانی سەرکردایەتیی پارتی سۆشیالیستی گەل و میوانانی بانگهێشتکراوی کۆنگرەکە ئەنجام دا و باسی پرسی سیاسیی گەلی کورد و پێشکەوتنەکانی هەرێمی کوردستان و دۆخی وڵاتانی ناوچەکە و ڕۆژهەڵاتی ناوەڕاست کرا.