وه‌زاره‌تی كاره‌بای حكوومه‌تی هه‌رێمی كوردستان بۆ گراننه‌بوونی نرخی نان و سه‌موون، ئه‌مڕۆ پێنجشه‌م بڕیارێكی نوێی بۆ به‌رژه‌وه‌ندی نانه‌واخانه و سه‌موونخانه‌كان ده‌ركرد.
به پێی ڕاگه‌یه‌نراوێكی وه‌زاره‌تی كاره‌با كه وێنه‌یه‌كی بۆ ماڵپه‌ڕی كوردستان تی ڤی نێردراوه، به فه‌رمانی سه‌رۆكایه‌تی ئه‌نجوومه‌نی وه‌زیران بڕیاریان دا به داشكاندنی 20%ی نرخی كاره‌بای به‌كارهاتوو بۆ سه‌رجه‌م نانه‌واخانه و سه‌موونخانه‌كان.
وه‌زاره‌تی كاره‌با ئاماژه‌ی به‌وه‌شداوه كه فه‌رمانه‌كه به هه‌ماهه‌نگی له‌گه‌ڵ وه‌زاره‌تی بازرگانی و پیشه‌سازی له ڕۆژی 1/9/2021 جێبه‌جێ ده‌كرێت.
جێی باسه دوێنێ چوارشه‌م ته‌وه‌رێكی كۆبوونه‌وه‌ی هه‌فتانه‌ی ئه‌نجوومه‌نی وه‌زیرانی حكوومه‌تی هه‌رێمی كوردستان به‌سه‌رۆكایه‌تی مه‌سڕوور بارزانی سه‌رۆكی حكوومه‌ت ته‌رخانكرابوو به چاره‌سه‌ركردنی كێشه‌ی فڕن و نانه‌واخانه‌كان و گرانبوونی نرخی نان و سه‌موون، جه‌ختیش له‌وه كرابووه‌وه كه ده‌بێت وه‌زاره‌ته په‌یوه‌ندیداره‌كان ئاسانكاری و پشتیوانیی نانه‌واخانه و سه‌موونخانه‌كان بكه‌ن له دابینكردنی پێداویستییه‌كان و ڕێكخستنه‌وه‌ی بابه‌تی هێنانی ئارد له ده‌ره‌وه‌ی هه‌رێمی كوردستان.
کۆمێنت (0)
تا ئێستا هیچ کۆمێنتێک نەکراوە.