سبەی ئۆپەراسیۆنەکانى فەڕەنسا بۆ جێهێشتنى خاکی ئەفغانستان کۆتایى پێ دێت

سەرۆکوەزیرانی فەڕەنسا، جان کاستێکس رایگەیاند کە سبەی ئۆپەراسیۆنەکانی چۆڵكردن و جێھێشتنی ئەفغانستان کۆتایی پێ دێت.
جان کاستێکس لە لێدوانێکیدا بۆ رادیۆی RTLى فەڕەنسى، ئەوەی ئاشکرا کرد کە فەڕەنسییەکان و ئەو ئەفغانستانییانەی کە ھاوکاری فەڕەنسایان کردووە لە ئەفغانستانەوە گەڕاندووەتەوە وڵاتەکە.
سەرۆکوەزیرانی فەڕەنسا ئاماژەی بەوەش کرد کە ژمارەی ئەو ئەفغانستانییانەی کە بۆ فەڕەنسا گواستراونەتەوە، دوو ھەزار و 500 کەس دەبن و ئەوەشی خستەڕوو کە ئێوارەی سبەی ئۆپەراسیۆنەکانی چۆڵکردن و جێھێشتنی ئەفغانستان کۆتایی پێ دێت.
جان کاستێکس ئەوەشی راگەیاند کە بەھۆی ئەوەی ئەمریکا لە 31 ئابدا لە ئەفغانستان دەکشێتەوە لە دوای ئێوارەی سبەییەوە، کاری گواستنەوە لە فڕۆکەخانەی كابولەوە ئەنجام نادەن.