سه‌رۆكایه‌تی هه‌رێمی كوردستان ، بڵاویكرده‌وه: رۆژی دووشه‌مه 2 ى 8 ى 2021 ، شێخ جەعفەر شێخ مستەفا جێگری سەرۆکی هەرێمی کوردستان، پێشوازی لە کۆڵۆنێل مایکڵ کۆلینان بەرپرسی ئۆپەراسیۆنی هێزە ئەمریکییه‌كان لە عێراق و پیتەر بلەیدس ڕاوێژکاری بەرپرسی ئۆپەراسیۆنەکانی هێزە ئەمریکییه‌كان لە عێراق کرد.
راشیده‌گه‌یه‌نن: لە کۆبوونەوەیەکدا دوایین ئەنجامەکانی گفتوگۆی ستراتیژیی عیراق و ئەمه‌ریکا، ئاڵۆزییەکان و جموجۆڵی داعش لە ناوچەکە و ئۆپەراسیۆنی سەربازیی سوپا و پێشمەرگە، بەردەوامیی یارمەتییە لۆجیستییەکان بۆ پێشمەرگە، چاکسازی و یەکخستنەوەی پێشمەرگە و چارەسەرکردنی دۆخى ئەو ناوچانەی بۆشاییی ئەمنییان تێدایه، تاوتوێ کرا.
جێگری سەرۆک سوپاسی هێزەکانی ئەمریکا و هاوپەیمانیی نێودەوڵەتیی دژی داعش کرد، هاریکاریی و یارمەتییە لۆجستییە سەربازییەکانی ئەمریکای بۆ پێشمەرگە بەرز نرخاند، هه‌روه‌ها جەختی لەسەر بەردەوامیى ئۆپەراسیۆنی هاوبەشى پێشمەرگە و سوپای عێراق بە پاڵپشتیی هاوپەیمانان بۆ له‌ناوبردنى یەکجارەکیی تیرۆریستان لە ناوچەکەدا، كرده‌وه.
لای خۆیەوە بەرپرسی ئۆپەراسیۆنەکانی هێزە ئەمریکییه‌كان لە عێراق، دووپاتی کردەوە کە وڵاتەکەی لە هاریکاری و پاراستنی ناوچەکە لە هەر مەترسییەک بەردەوام دەبێت، پاشان باسی لە گرنگیی گفتوگۆی ستراتیژیی عێراق و ئه‌مه‌ریكا و بە هاوبەشیی هەرێمی کوردستان کرد و خۆشحاڵیی خۆی بۆ پەرەپێدانی پەیوەندییه‌كان لە بواری ئابووری و سەربازیدا ده‌ربڕى.
هەردوولا لەسەر هەماهه‌نگی و پەرەپێدانی زیاتری پەیوەندییەکانی ئەمریکا و هەرێمی کوردستان هاوڕا بوون و جەختیان لەسه‌ر گرنگیی یەکخستنەوە و چاکسازیی پێشمەرگە و دروستکردنی هێزێکی یەکگرتووی نیشتیمانی كرده‌وه، هەروەها پڕکردنەوەی ئەو شوێنانەی بۆشاییی ئەمنییان هه‌یه بە گرنگ زانی، ئەمەش بە هەماهەنگی و گفتوگۆی زیاترى سوپای عێراق و پێشمەرگە.
کۆمێنت (0)
تا ئێستا هیچ کۆمێنتێک نەکراوە.