ئاهه‌نگی کردنه‌وه‌ی خولی یارییه‌کانی ئۆڵۆمپیادی هاوینه‌ی دواخراوی تۆکیۆ به‌ڕێوه‌ ده‌چێت

سبەی هەینی 23ى 7 ى 2021 ،  ئاهەنگی كردنەوەی خولی یاریەكانی ئۆڵۆمپیادی هاوینەی 2020ی تۆكیۆ بەڕێوەدەچێت.
 ئەو خولەی بەهۆی بڵاوبوونەوەی ڤایرۆسی كۆرۆناو بە هاوشێوەی چەندین پێشبڕكێی وەرزشی نێودەوڵەتی دیكە ساڵێك لە وادەی دیاریكراوی خۆی دواكەوت، پێشبڕكێ وەرزشیەكانی ئۆڵۆمپیادی تۆكیۆ لە بارودۆخێكی تایبەت و زۆربەی هەرە زۆری یاریەكانی بەبێ‌ ئامادەبوونی هاندەران بەڕێوەدەچێت.
 ئەویش بەهۆی ڕێكارەكانی حكومەتی ژاپۆن بۆ ڕێگریكردن لە بڵاوبوونەوەی زێتری ڤایرۆسی كۆرۆنا كە ژمارەی تووشبووانی ئەم پەتایە لەو وڵاتە ڕوو لە هەڵكشانە، شاندی وەرزشوانانی وڵاتانی بەشداربوو بە ڕێكاری توندی خۆپارێزی گەیشتنە ژاپۆن.
 لای خۆشیەوە تۆماس باخی ئەڵمانی و سەرۆكی لیژنەی ئۆڵۆمپی نێودەوڵەتی لە كۆنگرەیەكی ڕۆژنامەوانیدا ڕایگەیاند كە لە چاوەڕوانی ئاهەنگی كردنەوەی ئۆڵۆمپیادی تۆكیۆ دان و چركەساتی دەستپێكی ئاهەنگەكەش دەبێتە مایەی خۆشی و ئاسوودەیی بۆ ئەو وەرزشوانانەی كە ئاستەنگی زۆریان بینی بۆ گەیشتن بەم بۆنە وەرزشیە گرنگەی جیهان.
 باخ گوتیشی، بارودۆخی ئەمجارەی ئۆڵۆمپیاد زۆر تایبەتەو گەیشتن بە ئاهەنگی كردنەوەی ئۆڵۆمپیادی تۆكیۆ لەم بارودۆخە هەرگیز ئاسان نەبوو، جێگای باسە پێشبڕكێ وەرزشیەكانی ئۆڵۆمپیادی تۆكیۆ تا هەشتی مانگی داهاتوو بەردەوام دەبێت .