هۆشدارى له‌که‌مبوونى ئاوى دوکان و ده‌ربه‌ندیخان ده‌درێت

خالد سه‌لیم ئەحمه‌د بەرێوەبەری بەرهەمهێنانی کارەبای سلێمانی، هۆشداری له‌كه‌مبوونی ئاوی دوكان و ده‌ربه‌ندیخان ده‌دات و رایده‌گه‌ێنێت: مەترسی کەم بوونەوەی ئاو کەمتر نییە لە ڤایرۆسی  کۆرۆنا .
خالد سه‌لیم ئەحمه‌د بەرێوەبەری بەرهەمهێنانی کارەبای سلێمانی له‌راگه‌یاندراوێكدا بڵاوی كرده‌وه‌ته‌وه‌: بەنداوی دوکان (14) مەتر و بەنداوی دەربندیخانش (18) مەتر له‌ ئاستى پڕبوونى دابه‌زیووه‌.
ده‌شڵێت: بە پێی ئەو برە ئاوەی کە ئێستا هەیە لە بەنداوەکانی کوردستان، بەنداوی دوکان (14) مەتر لە ئاستی پڕبوونی خۆی دابەزیوە  و بەنداوی دەربندیخانش (18) مەتر، لە کاتێکدا هەموومان لە بیرمانە ساڵی 2019 هەردوو بەنداوی ناو براو لەم وەرزەدا تەواو پڕ بووبوون و ژمارەیەکی زۆری تۆرباینەکانی ویستگەکانمان ئیش پێدەکرد و ئاستی ئاوی بەنداوەکان لە لوتکەدا بوون.
 خالد سه‌لیم ئەحمه‌د بەرێوەبەری بەرهەمهێنانی کارەبای سلێمانی راشیده‌گه‌ێنێت: تەنها بەهۆی کەمبارانی ئەمساڵ ئاستی ئاو لە هەردوو بەنداودا زۆر کەمەو  لە هەر ویستگەیەکیش تەنها (1) یەک تۆرباین کاری پێدەکرێت و ئاستی ئاو دادەبەزێت.

ناوبراو ئاماژه‌ بۆ ئه‌وه‌ش ده‌كات:هەموومان دەزانین سەرچاوەی ئاو بۆ خواردنەوەو پێداویستییەکانی شاری سلێمانی بەنداوی دوکانە و ناوچەکانی گەرمیانیش بەنداوی دەربندیخانە ، لە ئێستادا بەهۆی گۆرینی رێرەوی ئەو سەرچاوانەی ئاو کە دەهاتنە ناو هەردوو بەنداوە  رێژەی هاتنی ئاو کەمی کردووە و کە ئەمەش مەترسیەکی گەورەیە لەسەر ئاوی هەردوو بەنداو  کەمبارانی ئەم ساڵ تەواو نزیکی کردینەوە لە مەترسی کەمی ئاو. 
خالد سه‌لیم ئەحمه‌د ده‌شڵێت: خۆ ئەگەر ساڵی داهاتوو، رێژەی باران بارین هاوشێوەی ئەم ساڵ بێت، ئەوە ئەو گرفتەیە کە  من داوام کردووە  گرنگی پێبدرێت و حکومەت و لایەنەکان بیکەنە دیالۆک و  گەران بەشوێن چارەسەردا ئەگەر گرنگی پێنەدرێت هەمووان گرفتار دەبین و ئاومان نابێت بۆ ژیانمان، پێویستیشه‌، وه‌ك ئه‌گه‌رێك له‌به‌رچازبگرێت و له‌ ئێستاوه‌ پلانى بۆ دابنرێت.

هه‌روه‌ها رایده‌گه‌ێنێت: لێره‌وه‌ داوا  لە حکومەت و وەزارەتەکان و پارێزگاری سلێمانی دەکەم، گرنگی بەم بابەتە بدەن و پلانی ساڵی داهاتوو لە ئێستەوە دابنێن لەسەر هەمان رێژەی باران بارینی ئەم ساڵ وەکو خۆ ئامادە کردن و چارەسەر  دۆزینەوە بۆ ساڵی داهاتوو.
داواش له‌ داوا لە وەزارەتى کارەبا دەکات، لە رێگەی کۆنترۆڵی کارەبای هەرێمەوە بەکارهێنان و ئیشپێکردنی یەکەکانی ( تۆرباینەکانی ) هەردوو وێستگەی بەرهەمهێنانی کارەبای دوکان و دەربندیخان لە ستراتیجی بەرهەمهێنانی کارەباوە بگۆرن بە ستراتیجی گل دانەوەی ئاو...! واتە کاتی ئیشپێکردنی یەکەکان  بگونجێنن لەگەڵ پێداویستی ئاوی شاری سلێمانی دەورو بەری و ناوچەی گەرمیان.  

 شوان عه‌زیز