سەرۆکی هەرێمى كوردستان بەبۆنەی جەژنی ئەکیتۆوە په‌یامێكی پیرۆزبایی ئاراسته‌ی خوشک و برایانی کلدانی، ئاشووری و سریانی لە کوردستان و عێراق و جیهان كرد ئه‌مه ده‌قه‌كه‌یه‌تی:
بەبۆنەی هاتنەوەی جەژنی (ئەکیتۆ) سەری ساڵی نوێی بابلیى ئاشوورییەوە، گەرمترین پیرۆزبایی لە ته‌واوى خوشک و برایانی کلدانی، ئاشووری و سریانی لە کوردستان و عێراق و جیهان دەکەم، هیوادارم ئەم بۆنەیە ببێتە مایەی خێر و خۆشی و گەڕانەوەی ئومێد و ئارامی بۆ ئەوان و هەموو هاووڵاتییان.
مایەی شانازییە کە کوردستان هەمیشە نیشتمانی پێکەوەژیان، فرەیی، لێبوردەیی ئایینی و نەتەوەیی بووە و کریستیانانیش پێکهاتەیەکی ڕەسەن و دێرینی ئەم خاک و نیشتمان و کولتوورە فرەڕەنگەن کە دەبێ بە هەموو شێوەیەک بیپارێزین و بەهێز و پتەوتری بکەین.
جەژنی ئەکیتۆ لە خوشک و برایانی کریستیانمان پیرۆز بێت و هیوادارم پێکەوە جەژن و بۆنەکانی داهاتوومان لە دۆخێکی باشتردا لە سایەی پێکەوەژیان و ئاشتی و ئارامیدا بکەینەوە، قەیران و تەنگانەمان تێپەڕاندبێ و پەتای کۆڤید_19 و دەرهاویشتەکانی بەرۆکی جیهان و مرۆڤایەتییان بەردابێت.
خوای مه‌زن کوردستان و کوردستانییان و تەواوی گەلانی جیهان بپارێزێت.
نێچیرڤان بارزانی
سەرۆکی هەرێمی کوردستان
31/3/2021
کۆمێنت (0)
تا ئێستا هیچ کۆمێنتێک نەکراوە.