سبه‌ی سیی و سێ ساڵ به‌سه‌ر تاوانی كیمیابارانكردنی هه‌ڵه‌بجه‌دا تێپه‌ڕ ده‌بێت.
له شازده‌ی ئاداری هه‌زار و نۆسه‌د و هه‌شتا و هه‌شت رژێمی به‌عسی له‌ناوچوو تاوانێكی دیكه‌ی ده‌رهه‌ق به گه‌لی كورد ئه‌نجام دا كه ویژدانی جیهانینی هه‌ژاند، له نزیكه‌ی كاتژمێر یازده‌ی پێشنیوه‌ڕۆی ئه‌م رۆژه، شاری هه‌ڵه‌بجه به چه‌كی كیمیایی بۆردومان كرا و له ئه‌نجام دا زیاتر له پێنج هه‌زار هاووڵاتیی بێ تاوان شه‌هید بوون و به هه‌زاران كه‌سی دیكه‌ش بریندار بوون، ئه‌مه‌ش سه‌رباری تێكچوونی ژینگه‌ی ناوچه‌كه و ئالوده‌بوونی به مادده‌ی كیمیایی.
سه‌ره‌ڕای تێپه‌ڕینی سیی و سێ ساڵ به‌سه‌ر ئه‌و تاوانه دڕندانه‌یه‌دا، به‌ڵام تا ئێستاش ئاسه‌واری له‌سه‌ر جه‌سته‌ی هاووڵاتییانی هه‌ڵه‌بجه و شار و ژینگه‌ی هه‌ڵه‌بجه ماوه، تا ئێستاش به سه‌دان به‌ركه‌وتووی چه‌كی كیمیایی به‌ده‌ست ئازاره‌كانیانه‌وه ده‌ناڵێنن و تا ئێستاش به سه‌دان منداڵی كیمیابارانی هه‌ڵه‌بجه بێسه‌روشوێنن.
ساڵانه وه‌ك رێزگرتن له یادی قوربانیانی تاوانی كیمیاباران كردنی هه‌ڵه‌بجه، هاووڵاتییانی هه‌رێمی كوردستان له شار و شارۆچكه جیاوازه‌كان له كاتژمێر ده و په‌نجا و پێنج خووله‌ك، بۆ ماوه‌ی پێنج خووله‌ك له شوێنی خۆیان به بێده‌نگی راده‌وه‌ستن.
له‌باره‌ی به‌ڕێوه‌چوونی یادی سیی و ساڵه‌ی تاوانی هه‌ڵه‌بجه‌ش پارێزگاری هه‌ڵه‌بجه ئازاد تۆفیق رایگه‌یاند: له كاتژمێر نۆ له چوارڕه‌یانی شه‌هید عومه‌ری خاوه‌ر ده‌ست به رێپێوانێكی ره‌سمی ده‌كه‌ین.
پارێزگاری هه‌ڵه‌بجه گوتیشی، بانگه‌واز بۆ سه‌رجه‌م كه‌سایه‌تییه‌كان، حكومه‌تی فیدڕاڵی و وڵاتانی دراوسێ و وڵاتانی ئه‌وروپا ده‌كه‌ین، ئاماده‌ی پێشوازی كردن لێیانین.
پارێزگاری هه‌ڵه‌بجه وتیشی، داوا له هاووڵاتییان و به‌شداربووان ده‌كه‌ین به پابه‌ندبوون به رێنماییه ته‌ندروستییه‌كان به‌شداری رێوڕه‌سمه‌كه بن.
کۆمێنت (0)
تا ئێستا هیچ کۆمێنتێک نەکراوە.