د. هێمن هه‌ورامی، جێگری سەرۆکی پەرلەمانی کوردستان له په‌یامێكدا ڕایگه‌یاند: له ١٩٩١/٣/٥ گه‌رمترین پیرۆزبایی ئاڕاسته‌ی كوردستانیان ده‌كه‌م و سه‌ری ڕێز بۆ شه‌هیدانی ڕاپه‌ڕین و سه‌رجه‌م شه‌هیدانی كوردستان داده‌نه‌وێنم.
٥ی ئازار یەکێکە لەو رۆژە تاقانانەی مێژووی کوردستان، کە ئیدی کۆتایی بە خەونی سڕینەوەی گەلی کوردستان هێناو و بووە سەرەتایی گەیشتن بە خەونە مەزنەکان و نزیکبوونەوە لە بەدیهێنانیان و کۆتایی بە دەسەڵاتی زاڵمانەی بەعسی شۆفێنی هێنا.
ڕاپه‌ڕین ده‌سپێكی قۆناغێكی كاریگه‌ره له‌مێژوو‌ماندا كه‌تێیدا قه‌واره‌ی سیاسیی كوردستان و بنیاتنانی جومگه سه‌ره‌كییه‌كانی ده‌وڵه‌تداری له‌دامه‌زراندنی په‌رله‌مان و حكومه‌ت و دامه‌زراوه ده‌وڵه‌تییه‌كان و فه‌راهه‌مكردنى ماف و ئازادییه‌كان بنیاتنران و گەشەیان پێدرا، و بۆ كۆمه‌ڵگه‌ی نێوده‌ڵه‌تی و دۆست و دوژمنان، سه‌لمێندرا گه‌لی كوردستان خاوه‌نی مێژوو و شوناس و كلتووری تایبه‌تیی خۆیه‌تی و خواستى به‌هێزى هه‌یه بۆ خۆبه‌ڕێوه‌بردن و خۆژیانکردن، ئەگەر دەرفەتی هاوشێوەی میللەتانی پێبدرێت، دەبێتە فاکتەری ئارامی و ئاسایش لە هەموو ناوچەکە.
لەیادی راپەڕین، کە یەکڕیزیی و یەکگرتووی هێزە خەباتکارە کورستانییەکان لە چوارچێوەی بەرەی کوردستانی بووە هەوێنی سەرکەوتنی، جێی خۆیەتی جەخت لە یەکڕێزی وتەبایی نێوان سەرجەم هێز و لایەنە سیاسیەکانی کوردستان بکەینەوە، بۆ پاراستنی قەوارەی دەستوری هەرێمی کوردستان و دەسکەوتە دەستووری و یاساییە وەدیهاتووەکان، مێژووش سەلماندویەتی بەیەکڕێزی وتەبایی دەتوانین دەستکەوتی زیاتر بۆ کوردستانیان مسۆگەر بکەین و تاقە رێگەی چەسپاندنی زیاتری مافەکانمانە.
جارێکیتر به‌رزو پیرۆزبێت ساڵیادی ڕاپه‌ڕینە مەزنەکەمان، نه‌مری بۆ شه‌هیدان، یادو بیره‌وه‌رییه‌كانی ڕۆژگاری ڕاپه‌ڕین و ئازادی كوردستان بۆ نه‌وه‌كانی ئاینده‌ش هه‌ر به‌زیندوویی دەمێنێته‌وه.
د. هێمن هەورامی
جێگری سەرۆکی پەرلەمانی کوردستان
٢٠٢١/٣/٤
کۆمێنت (0)
تا ئێستا هیچ کۆمێنتێک نەکراوە.