د.جوتیار عادل: پێشبینی ده‌که‌ین به‌م زووانه‌ بگه‌ینه‌ رێککه‌وتن له‌گه‌ڵ حکوومه‌تی فیدراڵ

وتەبێژی حکومەتی هەرێمی کوردستان رایگەیاند: گفتوگۆکانی نێوان هەرێم و حكوومه‌تی فیدراڵ بەردەوامن و دڵنیام ده‌گه‌یه‌نه‌ رێککەوتن.

ئەمڕۆ چوارشەممە 2021/2/24 ئەنجومەنی وەزیرانی هەرێمی کوردستان بە سەرۆکایەتی مەسرور بارزانی سەرۆکی ئەنجومەنی وەزیران و ئامادەبوونی قوباد تاڵەبانی جێگری سەرۆکی ئەنجومەن کۆبووەوە، دوای کۆتاییهاتنی کۆبوونەوەی ئەنجومەنی وەزیران د.جوتیار عادل، وتەبێژی حکومەتی هەرێم له‌ كۆنگره‌یه‌كی رۆژنامه‌وانیدا باسی لە دواین پێشهاتەکانی دانوستانی نێوان هەرێم و حكوومه‌تی فیدراڵ کرد سەبارەت بە پرسی بودجە  رایگه‌یاند: هەرێمی کوردستان سەرجەم پابەندییە دەستورییەکان جێبەجێ دەکات و لە پرسی رێککەوتن لەگەڵ بەغدا جددیە.

وتەبێژی حکومەتی هەرێم رایگه‌یاند: گفتوگۆکان لەگەڵ حکومەتی فیدراڵ بەردەوامە و لە
کەشێکی ئیجابیدا بەڕێوەدەچێت و ئومێدمان وایە و دڵنیاین لەوەی بگەین بە رێککەوتن.

د.جوتیار عادل راشیگەیاند: بڕوامان بەوەیە کە بودجەی فیدراڵی دادپەروەرانە دابەشبکرێت و بۆ ئەوەش، ئێمە لای خۆمانەوە ئەرکەکانی خۆمان ئەنجامداوە.

د.جوتیار عادل گوتیشی: پێشبینی ده‌كه‌ین به‌م زووانه‌ بگه‌ینه‌ رێككه‌وتن له‌گه‌ڵ حكوومه‌تی فیدراڵ.

هه‌ر لە کۆنگرە رۆژنامەوانیدا د.جوتیارعادل، سەبارەت بە پرۆژە یاساى بودجەى هەرێمى کوردستانیش رایگەیاند: زۆربەى وەزارەتەکان داتاى خەرجى و داهاتەکانیان ئامادەکردوە، پێدەچێت لە ماوەى (10) رۆژى داهاتوودا پرۆژە یاساى بودجەى ئەمساڵى هەرێمى کوردستان ئامادە بکرێت و ڕەوانەى پەرلەمان بکرێت.

له‌ ته‌وه‌رێكی دیكه‌ كۆنگره‌ رۆژنامه‌وانییه‌كه‌یدا د. جوتیار عادل وته‌بێژی حكوومه‌تی هه‌رێمی كوردستان سه‌باره‌ت به‌ دۆخی كۆرۆنا له‌ هه‌رێم رایگه‌یاند: دۆخه‌كه‌ له‌ كۆنترۆڵ دایه‌، به‌ڵام پێویسته‌ رێنماییه‌كانی ته‌ندروستی توندتر بكرێت بۆ رێگری و زیاتر ته‌شه‌نه‌ نه‌كردنی كۆرۆنای نوێ. گوتیشی، پێویسته‌ له‌ داموده‌زگاكانی حكوومه‌تی پابه‌ندییه‌كان زیاتر بكرێت.

بۆ بینینی ده‌قی كۆنگره‌ رۆژنامه‌وانیه‌كه‌ی وته‌بێژی حكوومه‌تی هه‌رێم ئه‌م لینكه‌ی خواره‌وه‌ كلیك بكه‌:

https://www.facebook.com/kurdistantvcenter/videos/425909568639056