وه‌زاره‌تی ته‌ندروستیی و ژینگه‌ی عێراق رایگه‌یاند، عێراق چووه‌ته قۆناغی مه‌ترسیدار له په‌تای كۆرۆنا.
ریاز عه‌بدولئه‌میر حه‌لفی، به‌ڕێوه‌به‌ری گشتی ته‌ندروستیی كۆمه‌ڵ له وه‌زاره‌تی ته‌ندروستیی و ژینگه‌ی عێراق، له لیدوانێكدا بۆ ئاژانسی فه‌رمی هه‌واڵی عێراق رایگه‌یاند: "عێراق چووه قۆناغی مه‌ترسیدار له په‌تای كۆرۆنا".
ریاز عه‌بدولئه‌میر راشیگه‌یاند: "وه‌زاره‌تی ته‌ندروستیی چه‌ندینجار جه‌ختی له‌وه كرده‌وه كه دۆخی عێراق جیاواز نییه له‌و وڵاتانه‌ی كه ڤایرۆسه‌كه به‌شێوه‌یه‌كی به‌ربڵاو تیایدا ته‌شه‌نه‌ی سه‌ندووه".
به‌ڕێوه‌به‌ری گشتی ته‌ندروستیی كۆمه‌ڵ له وه‌زاره‌تی ته‌ندروستیی و ژینگه‌ی عێراق گوتیشی: "پابه‌ندنه‌بوونی هاووڵاتییان بووه هۆی به‌رزبوونه‌وه‌ی ژماره‌ی تووشبووان و گیانله‌ده‌ستدان به ڤایرۆسه‌كه".
ریاز عه‌بدولئه‌میر حه‌لفی داوای له هاووڵاتییان كرد پابه‌ندی رێنماییه‌كانی ته‌ندروستیی بن و گوتی: "پابه‌ندبوون به رێنماییه‌كانی خۆپارێزی و به‌ستنی ماسك تاكه چاره‌سه‌ری كاریگه‌ره بۆ رێگه‌گرتن له بڵاوبوونه‌وه‌ی زیاتری ڤایرۆسه‌كه".
ریاز عه‌بدولئه‌میر حه‌لفی ئاماژه‌ی به‌وه‌شكرد كه جۆری نوێی ڤایرۆسی كۆرۆنا هیچ جیاوازییه‌كی له‌گه‌ڵ جۆره‌كه‌ی پێشوودا نییه، و پێویست به جیاكردنه‌وه‌ی تووشبووان به جۆری گۆڕاوای ڤایرۆسه‌كه له‌گه‌ڵ تووشبووان به جۆره كۆنه‌كه‌ی ڤایرۆسه‌كه ناكات و روونیكرده‌وه كه هه‌ردوو حاڵه‌ته‌كه‌ی تووشبوون به‌پێی هه‌مان پرۆتۆكۆل و رێككاره‌كانی ته‌ندروستیی مامه‌ڵه‌یان له‌گه‌ڵدا ده‌كرێت و پشكنینه‌كانیش له‌هه‌مان تاقیگه‌كاندا ده‌كرێن.
به‌ڕێوه‌به‌ری گشتی ته‌ندروستیی كۆمه‌ڵ له وه‌زاره‌تی ته‌ندروستیی و ژینگه‌ی عێراق، ریاز عه‌بدولئه‌میر حه‌لفی راشیگه‌یاند كه سه‌رجه‌م پێدوایستییه ته‌ندروستیی و خۆپارێزییه‌كانیان له‌به‌رده‌ستدا هه‌یه.
کۆمێنت (0)
تا ئێستا هیچ کۆمێنتێک نەکراوە.