ئه‌مڕۆ پێنجشه‌ممه 2021/2/18 مه‌سرور بارزانی پێشوازی له به‌رپرسی ده‌سته‌ی رێكخراوه جه‌ماوه‌ری و پیشه‌ییه‌كانی پارتی و هه‌ردوو سكرتاریه‌تی قوتابیان و لاوان كرد.
له ده‌ستپێكی دیداره‌كه‌دا، مه‌سرور بارزانی به‌بۆنه‌ی 68 ساڵیادی دامه‌زراندنی یه‌كێتیی قوتابیانی كوردستان و یه‌كێتیی لاوانی دیموكراتی كوردستان، پیرۆزبایی له هه‌ردوو ڕێكخراوه‌كه كرد و هیوای سه‌ركه‌وتن و به‌رده‌وامیی بۆ خواستن له كاری ڕێكخراوه‌ییاندا.
مه‌سرور بارزانی ئاماژه‌ی به‌وه‌دا، هه‌ردوو ڕێكخراوه‌كه له قۆناغه جیاجیاكانی شۆڕش و تێكۆشانی بزووتنه‌وه‌ی ڕزگاریخوازی گه‌لی كوردستاندا، ڕۆڵێكی گرنگ و پێشه‌نگیان هه‌بووه و مێژوویه‌كی گه‌شیان هه‌یه و قوتابخانه‌یه‌ك بوونه بۆ پێگه‌یاندنی چه‌ندین سه‌ركرده‌ی لێهاتوو و به‌توانا كه خزمه‌تێكی به‌رچاویان پێشكه‌شی كوردستان كردووه.
هه‌روه‌ها مه‌سرور بارزانی جه‌ختی له‌وه كرده‌وه كه پێویسته هه‌ردوو یه‌كێتی قوتابیان و لاوان، به گیانێكی داهێنه‌رانه‌وه، به‌رده‌وام بن له درێژه‌دان به ڕۆڵی پێشه‌نگانه‌ی خۆیان، بۆ په‌ره‌پێدانی هزری نیشتمانپه‌روه‌ری و به‌ره‌وپێشبردنی تواناكانی خۆیان به سوود وه‌رگرتن له پێشكه‌وتنه‌كانی سه‌رده‌م، بۆ ئه‌وه‌ی بتوانن به باشترین شێوه خزمه‌تی كوردستان بكه‌ن.
کۆمێنت (0)
تا ئێستا هیچ کۆمێنتێک نەکراوە.