لیژنەی شارەوانی کار لەسەر ھەمواری یاسای ئەو زەویانە دەکات کە زێدەڕۆییان کراوەتە سەر

بەمەبەستی گفتوگۆکردن لەسەر ھەمواری یاسای ژمارە ٣ ی ساڵی ٢٠١٩ ، نیوەڕۆی ئەمڕۆ دووشەممە ٨/٢/٢٠٢١ لیژنەی شارەوانی و گواستنەوە و گەیاندن و گەشت و گوزار، بەسەرپەرشتی لوقمان وەردی سەرۆکی لیژنە و ئامادەبوونی جێگری سەرۆکی لیژنەو ئەندامان و ڕاوێژکارانی لێژنەکە کۆبوونەوە.
لە کۆبونەوەکەدا، گفتوگۆکرا لەسەر ئەو ماددە و بڕگانەی پێویستیان بە ھەموارکردن و گۆڕانکاری ھەیە لە یاسای ژمارە ٣ی ساڵی ٢٠١٩ ی یاسای بەخاوەنکردنی ئەوزەویانەی لەسنوری شارەوانیەکان زێدەڕۆییان لەسەرکراوە ، ئەمەش دوایی ئەنجامدانی زنجیرەیەک کۆبوونەوە و دیدار لەگەڵ بەرپرسانی وەزارەتی شارەوانی و بەڕێوبەری گشتی شارەوانیەکانی پارێزگاکان و ئیدارە سەربەخۆکان و وەرگرتنی ڕاو پێشنیاری کەسانی پسپۆڕ و شارەزای بوارەکە.
سەرۆک و ئەندامانی لیژنە ڕاو سەرنجی خۆیان لەسەر ماددە و بڕگەکان خستە ڕوو، و ڕاپۆرتی کۆتایی ھەموارەکەیان ئامادەکرد و ئاراستەی سەرۆکایەتی پەرلەمانیان کرد بۆ وەرگرتنی ڕێکارە پەیرەوییەکان بۆ ئەوەی خوێندنەوەی یەکەمی بۆ بکرێت.