ئه‌مڕۆ دووشه‌ممه 1 ى 2 ى 2021 ، 17 ساڵ به‌سه‌ر ته‌قینه‌وه‌كانی یه‌كی شوبات له باره‌گاكانی پارتی و یه‌كێتی له هه‌ولێر تێده‌په‌ڕێت .
17 ساڵ له‌مه‌وبه‌ر و له 1ی شوباتی 2004، له هه‌ریه‌ك له باره‌گاكانی لقی 2ی پارتی دیموكراتی كوردستان و مه‌ڵبه‌ندی 3ی یه‌كێتی نیشتمانی كوردستان، له‌كاتی پێشوازیكردن له میوانان بۆ جه‌ژنه پیرۆزه، دوو ته‌قینه‌وه هه‌ردوو باره‌گای لقی دووی پارتی دیموكراتی كوردستان و مه‌ڵبه‌ندی سێی یه‌كێتی نیشتیمانی كوردستان به‌ئامانج گرت ، به‌هۆیه‌وه چه‌ندین سه‌ركرده و كادر و هاووڵاتی له‌هه‌ردوو پارتدا شه‌هید و برینداربوون ، له‌م یاده‌شدا د.هێمن هه‌ورامی جێگری سه‌رۆكی په‌رله‌مانی كوردستان په‌یامێكی بڵاو كرده‌وه .
ده‌قی په‌یامه‌كه‌ی جێگری سه‌رۆكی په‌رله‌مانی كوردستان:
په‌یامى د.هێمن هه‌ورامی له‌ساڵیادی كاره‌ساتی یه‌كی شوبات-دا
ساڵێکی دیکەش بەخەمناکییەوە، یادی کارەساتی جەرگبڕی ١ی شوبات دەکەینەوە، کارەساتێک لەبەرەبەیانییەکدا گیانی پۆلێک رۆڵەی قارەمان و سەرکردەی ئەم میللەتەی لەگەڵ خۆی راپێچکرد، لەو بەرەبەیانە کەخەڵک سەرگەرمی جەژن و گێڕانی شادی بوون، تیرۆریستان پیلانێکی چەپەڵ و نامەردانەیان جێبەجێکردو یەکەم ڕۆژی جەژنیشیان بەکارهێنا بۆ جێبەجێکردنی پیلانە گڵاوەکەیان بەسوود وەرگرتن لەمیوان دۆستی و برایەتی و یەکڕیزیی خەڵک و خەباتکارانی کوردستان.
١ی شوبات هەم درێژکراوەی تاوانکاریی دوژمنان بوو لەدژی خەڵکی کوردستان، هەمیشه دووپاتکردنەوەی ئەو راستییە بوو کەدوژمنان و رقهەڵگران بەیەکڕیزی و تەبایی ئەم میللەتە ناڕەحەت و نیگەرانن، ئەوان هەموو دەرفەت و هەلێک بۆ تێکدانی هەرجۆرە نزیکی و یەکڕیزییەک لەدەست نادەن و سێرەیان هەمیشە بەئامانجی تێکدانی تەبایی دانابڕێنن، تاکو ئێستاش هەڕەشەی راسته‌قینه لەسەر قەوارەی دەستووریی هەرێمی کوردستان هەیە.
ئەم یاده لەکاتێکدایە کەداعش لەناوچە کوردستانییەکانی دەرەوەی ئیداره‌ى هەرێم هەرەشەی راسته‌قینه‌ن لەسەر کوردستان و هەموو پێکهاتەکانی دەڤەرەکەو پێویستە هەموومان بەیەکەوە رووبەڕووی ئەو مەترسییانە ببینەوە.
لەکۆتاییدا، جارێکی دیکە سەرەخۆشی لەهەموو خەڵک و خانەوادەی سەربەرزی شەهیدان دەکەین و سه‌رى رێزو نه‌وازش بۆ شه‌هیدانی یه‌كی شوبات و سه‌رجه‌م شه‌هیدانی كوردستان داده‌نوێنین.
د.هێمن هەورامی
جێگری سەرۆکی پەرلەمانی کوردستان
١ی شوباتی ٢٠٢١
کۆمێنت (0)
تا ئێستا هیچ کۆمێنتێک نەکراوە.