عه‌بد حوسێن ھینداوی، راوێژكاری سه‌رۆكوه‌زیرانی عێراق بۆ كاروباری ھه‌ڵبژاردنه‌كان، رایگه‌یاند كه چاودێركردنی ھه‌ڵبژاردنی پێشوه‌خته له‌لایه‌ن كۆمه‌ڵگای نێوده‌وڵه‌تییه‌وه، مانای سه‌رپه‌شتیكردن و به‌ڕێوه‌بردنی پڕۆسه‌كه نییه.
عه‌بد حوسێن ھینداوی له لێدوانێكی رۆژنامه‌وانییدا ئاماژه‌ی به‌وه‌دا كه چاودێركردنی ھه‌ڵبژاردنی پێشوه‌خته له‌لایه‌ن كۆمه‌ڵگای نێوده‌وڵه‌تییه‌وه له ھه‌موو جیھان ھه‌یه و عێراق داوای له نه‌ته‌وه یه‌كگرتووه‌كان كردووه كه چاودێری پرۆسه‌كه بكات و گوتی: نه‌ته‌وه یه‌كگرتووه‌كان و كۆمه‌ڵگای نێوده‌وڵه‌تیی پاڵپشتیی خۆیان بۆ ئه‌نجامدانی ھه‌ڵبژاردنێكی پاك و بێگه‌رد و چاوێریكردنی پڕۆسه‌كه دووپاتكردووه‌ته‌وه.
گوتیشی: چاودێریكردنی ھه‌ڵبژاردنی پێشوه‌خته له‌لایه‌ن كۆمه‌ڵگای نێوده‌وڵه‌تییه‌وه مانای سه‌رپه‌شتیكردن و به‌ڕێوه‌بردنی پڕۆسه‌كه نییه، به‌ڵكو ته‌نھا چاودێریكردنه.
راوێژكاری سه‌رۆكوه‌زیرانی عێراق بۆ كاروباری ھه‌ڵبژاردنه‌كان، باسی له‌وه‌شكرد كه له‌سه‌ر ئاستی ناوخۆ ھه‌ریه‌ك له تۆڕه‌كانی شه‌مش، حامورابی و ته‌مووز هه‌روه‌ها تیمه‌كانی پارێزه‌ران چاودێری پرۆسه‌كه ده‌كه‌ن و گوتی: له‌سه‌ر ئاستی نێوده‌وڵه‌تیش، چاودێری پڕۆسه‌ی ھه‌ڵبژاردنه‌كان ده‌كرێت، به‌ڵام ئه‌مه زیان به سه‌روه‌ریی وڵات ناگه‌یه‌نێت، ته‌نانه‌ت پارته‌كانیش له رێگای بریكاره‌كانی خۆیانه‌وه چاودێریی ھه‌ڵبژاردنه‌كه ده‌كه‌ن.
گوتیشی: كۆمیسیۆنی باڵای سه‌ربه‌خۆی ھه‌ڵبژاردنه‌كان، خۆی پلان و به‌ڕێوه‌بردنی پرۆسه‌كه داده‌نێت، به‌و پێیه‌ی پرسه‌كه تایبه‌ته به عێراقییه‌كان و ئه‌نجامدانیشی ته‌نھا به‌رپرسیارێتیی عێراقییه‌كانه.
عه‌بد حوسێن ھینداوی راشیگه‌یاند كه دیدار له‌گه‌ڵ شاندی یه‌كێتیی ئه‌ورووپا سه‌باره‌ت به پێشكه‌شكردنی پاڵپشتیی ھونه‌ری، لۆجستیی و چاودێریكردن بۆ ئه‌نجامدانی ھه‌ڵبژاردنی پێشوه‌خته له عێراق ئه‌نجام ده‌درێت و گوتی: یه‌كێتیی ئه‌ورووپا په‌یوه‌ندییه‌كی باشی له‌گه‌ڵ كۆمیسیۆن و ژماره‌یه‌ك دامه‌زراوه‌ی ده‌وڵه‌ت ھه‌یه.
شایانی باسه بڕیاره ھه‌ڵبژاردنی پێشوه‌خته له ١٠ی تشرینی یه‌كه‌می ئه‌مساڵ ئه‌نجام بدرێت.
کۆمێنت (0)
تا ئێستا هیچ کۆمێنتێک نەکراوە.