هه‌ولێر .. باندێکی چوار که‌سی ده‌ستگیرکران که‌ سەرانەیان له‌ هاووڵاتیان وه‌رده‌گرت

پۆلیسی پارێزگای هەولێر توانیویانە چوار کەس لە شارۆچکەی عەنکاوە دەستگیربکەن کە سەرانەیان لە خەڵک وەرگرتووە.

سه‌رله‌ئێواره‌ی ئه‌مرۆ دووشه‌ممه‌ هۆگر عەزیز، گوتەبێژی بەڕێوەبەرایەتیی پۆلیسی هەولێر له‌ كۆنگره‌یه‌كی رۆژنامه‌وانیدا رایگه‌یاند: هێزه‌كانیان توانیویانه‌ چوار  کەس لە شارۆچکەی عەنکاوە دەستگیربکەن کە سەرانەیان به‌ زه‌بری چه‌ك و چه‌قۆ لە خەڵک وەرگرتووە، كه‌ پاره‌یان پێ بده‌ن.

گوتەبێژی بەڕێوەبەرایەتیی پۆلیسی هەولێر گوتیشی: ئه‌و چوار كه‌سه‌ خۆیان دانیان به‌ تاوانه‌كه‌ ناوه‌ و به‌ ئۆتۆمبێلێكی جۆری BMW بێ ژماره‌ ئه‌و كارانه‌یان ئه‌نجامده‌دا، شه‌وانه‌ له‌ شارۆچكه‌ی عه‌نكاوه‌ و گه‌ڕه‌كی نازناز كاری رێگریان ده‌كردو پاره‌یان له‌ هاووڵاتیان وه‌رده‌گرت، خۆشبه‌ختانه‌ توانرا له‌لایه‌ن هێزه‌كانمان ده‌ستگیر بكرێن.

گوتیشی: تاوه‌كو ئێستا چوار تاوانیان ئه‌نجامداوه‌، به‌ڵام به‌ پێشبینی ئێمه‌ حاڵه‌تێكی دیكه‌یان ئه‌نجامدا بێت، راشیگه‌یاند چوار تۆمەتباره‌ بە ناوەكانی (ر.ا.خ) و (خ.ر.ج) و (ر.ح.ر) و (د.م.س) دەستگیر كراون و ته‌مه‌نیان له‌ 20 ساڵ تاكو 30 ساڵه‌.

هۆگر عەزیز، گوتەبێژی بەڕێوەبەرایەتیی پۆلیسی هەولێر ئاماژه‌ی به‌وه‌شكرد تۆمه‌تباره‌كان به‌ ماددەی 442 لە یاسای سزادان، ڕاگیران و ئۆتۆمبێلەكە و ئەو چەقۆ و حەربە و كەرستانەش كە بۆ رێگریكردن و هەڕەشەكردن لە هاووڵاتیان بەكاریان دەهێنان، دەستیان بەسەردا گیرا.