بە سەرمەقولات دێمە ئەو شوێنەی تۆ حەز بکەی

سەر لە بەیانی ڕۆژی ۲٠٠۱/٥/۲۹ لە کاتی دەوام لە ئۆفیسی گۆڤاری ڕامان کە بەرانبەر سوپەرمارکێتی نیوستی و لە سەرەتای باداوا بوو ، زەنگێکم بۆ هات ، هەر زوو بە دەنگەکەی زانیم ئەوەی قسە دەکات مامۆستا ( ئەحمەد هەردی )یە .

م. ئەحمەد هەردی کە لە حەفتاکان ئەو کاتەی سەرەتای خوێندنەوەم بووم بە زمانی کوردی خۆشەویستییەکی بێسنوورم بۆ شیعرەکانی هەبوو ، تەنانەت هەر (۱٤) شیعرەکەی کۆشیعری (ڕازی تەنیایی)م ئەزبەرکردبوو ، کە چوومە سلێمانی هێشتا نەگەڕابووەوە کە بەسەر هەواڵی کۆچی دوایی ئەو شاعیرە گرنگەدا کەوتم ، لە بیرمە لەتیف هەڵمەت خێرا شیعرێکی شیوەنی بۆ نووسی و لە کۆشیعری (گەردەلوولی سپی)دا بڵاوی کردەوە ، بەڵام ئەوەندەی پێ نەچوو شوکر هەواڵی مەرگی بە درۆ خرایەوە ، دوای ساڵانێک خۆشی گەڕایەوە سلێمانی . منێکی سەرسام بە کەسایەتی ئەو و تامەزرۆی شیعرەکانی هەر زوو بە خزمەتی گەیشتم و لە نزیکەوە ناسیم ، سەرەتا لە بەڕێوەبەرایەتیی پەروەردەی سلێمانی کە بەرانبەر مزگەوتی گەورە ، لە شوێنی ئێستای کاسۆ مۆڵ بوو ، هەر کاتێ بمویستبا لە ژوورەکەی کاک مەحموود تۆفیق خەزنەدار ( بەرپرسی کارگێڕی و دارایی سانەوی بوو ) ، یان ژوورەکەی ڕەحمەتی مەحموود میرزا دەمبینی و هەر جارێک دوو ـ سێ سەعاتمان بە قسە و باسی جۆراوجۆر بەڕێ دەکرد ، ئیدی ئەوەندە لێی نزیک بووبوومەوە خۆی هەواڵی دەپرسیم و داوای لێ دەکردم لە ماڵەوە سەردانی بکەم ، زۆر جاریش کتێبێک ، سەرچاوەیەکی بویستبا داوای لێ دەکردم بۆی پەیدا بکەم و بۆی ببەم . مایەی شانازییە بۆ من کە مشتومڕێکی ئەدەبی کەوتە نێوان من و ڕەوانشاد محەمەدی مەلا کەریم ، مامۆستا کە پێیان دەگوت زۆر تەنبەڵە لە نووسین ، بۆ پشتیوانی کردنم هاتە دەنگ و بابەتەکەی بڵاو کردەوە ، ئەوەش بووە هۆی دۆڕانی دەستێک چاکەت و پانتۆڵ (قاتێک) لەلایەن ڕەحمەتی عەلی بۆسکانی ، چونکە گرەوی لەگەڵم کرد کە هەردی ئەو وتارە نانووسێ .
م . هەردی لە پێوەندییە تەلەفونییەکەی ئەو ڕۆژە پێی ڕاگەیاندم کە زۆر حەز دەکات بمبینێ ، بەڵام بەهۆی پیرییەوە ناتوانێ سەردانم بکات ، منیش پێم گوت کە تۆ حەز بە بینینی من بکەیت ، ئەو من بە سەرمەقولات دێمە ئەو شوێنەی تۆ حەز بکەی . پێی وتم من لە ماڵی (د. شەفیق قەزاز)ی زاوام دابەزیوم ، پێم خۆشە ئێوارە بێیتە ئەوێ یەکتر ببینین ، منیش هەر گورج زەنگم بۆ کاک فارس سەعدی فۆتۆگرافەر لێ دا و پێم ڕاگەیاند خۆی و کامێراکەی لە کات و شوێنی دیاریکراو ئامادە بێ .. کە چوومە ماڵی د. شەفیق قەزاز دیار بوو زەنگی بۆ کۆمەڵێک هاوڕێی تریش لێ دابوو ، کەسانێ لەوانەی حەزی بە بینینیان کردبوو لەوانەش : لە چەپەوە : ئەمین مەولوود (وەزیری پیشەسازی پێشووتر) ، فازڵ سۆرانی (کە وەک مام هەردی وتی لە سەقز دراوسێیان بووە) ، عەلی بەگی حسەین بەگ (کە چوومە سلێمانی لە دەستەی گشتیی کشتوکاڵی سلێمانی پێکەوە فەرمانبەر بووین و لەو ڕۆژەوە بووینە دۆست و هاوڕێی نزیک ) ، د. عەزیز گەردی ، ئەحمەد هەردی ، د.مارف خەزنەدار ، ئازاد عەبدولواحید ، هونەرمەند ئەحمەد سالار ، د. شەفیق قەزاز ، ئەو شەوە شەوێکی مێژوویی ئێجگار خۆشمان گوزەراند ، لە پاش ئەوەی چەند ساڵێک بوو مامۆستا (هەردی)یمان نەدیبوو ، چونکە ئەو کاتە لە لەندەن دەژیا ، شایانی باسە خاتوو چلوورە هەردی کچی مامۆستا ئەو ئێوارەیە ئەرکی زۆری کێشابوو و خواردنێکی شاهانەی بۆمان ئامادە کردبوو .. بەو سەرقاڵی و هیلاکییەوە من دەفەتم لە مام هەردی هێنا و گفتوگۆیەکی دوو سەعاتیم لەگەڵی ساز کرد کە دواتر لەگەڵ زۆر گفتوگۆی پچڕپچڕی دی لە ژمارەیەکی گۆڤاری ڕامان بڵاوم کردەوە ، بەشێکیشی ماوە لە داهاتوودا بڵاوی دەکەمەوە ، ئەمە چەردەیەکە ، یان بڵێم مشتێکە لە خەرواری بیرەوەرییەکانم لەگەڵ ئەو مامۆستا پایەبەرزە کە تا دنیا دنیایە شیعر و ئەدەبی کوردی شانازی پێوە دەکات .

ئازاد عه‌بدلواحید
له‌ والی فیسبوكی به‌رێز ئازاد عه‌بدولواحید وه‌رگیراوه‌.