نووسینگه‌ی جێگری سه‌رۆكی پارتی له‌گه‌ڵ ده‌سته‌ی چاودێری و به‌دواداچوونی پارتی كۆده‌بێته‌وه.
نیوه‌ڕۆی ئه‌مڕۆ دوو شه‌ممه 24/2/2020 نووسینگه‌ی جێگری سه‌رۆكی پارتی دیموكراتی كوردستان له‌گه‌ڵ به‌ڕێزان به‌رپرس و ئه‌ندامانی ده‌سته‌ی چاودێری و به‌دواداوچوونی پارتی دیموكراتی كوردستان كۆبووه‌وه.
سه‌ره‌تا ته‌ها به‌رواری به‌ڕێوه‌به‌ری نووسینگه وێڕای به‌خێرهاتنیان، سڵاو و ڕێزی رێزدار نێچیرڤان بارزانی جێگری سه‌رۆكی پارتی پێگه‌یاندن و به‌ناوی به‌ڕێزیانه‌وه ده‌ستخۆشی لێ كردن و رۆڵی ده‌سته‌كه‌ی له چاودێری و به‌دواداچوون و به‌سه‌ركردنه‌وه‌ی ناوه‌ند و ئۆرگانه‌كانی پارتی، به‌رز نرخاند.
دواتر مه‌سعوود ساڵه‌یی به‌رپرسی ده‌سته‌ی چاودێری و به‌دواداچوون وێڕای ده‌ربڕینی خۆشحاڵی به ڕه‌خساندنی ده‌رفه‌تی كۆبوونه‌وه، هه‌روه‌ها پوخته‌یه‌كی ده‌رباره‌ی كار و چالاكییه‌كانی ده‌سته له به‌سه‌ركردنه‌وه‌ی ته‌واوی ئۆرگانه حزبیه‌كان، ئاماده‌كردنی چه‌ند راپۆرتێك بۆ چاره‌سه‌ركردنی كێشه‌ی ناوه‌نده حزبییه‌كان، درێژه‌دان به پرۆسه‌ی هه‌ڵسه‌نگاندن و به‌دواداچوون، ستراتیژ و پلانی داهاتوویان پێشكه‌ش كرد كه ئه‌م هه‌نگاوانه‌یان ئه‌نجامی ئه‌رێنی لێكه‌وتۆته‌وه.
تاوتوێ كردنی بارودۆخی ناوخۆی عێراق و كوردستان به گشتی، ڕۆڵی به‌ڕێز نێچیرڤان بارزانی سه‌رۆكی هه‌رێمی كوردستان له هه‌نگاوه‌كان بۆ یه‌كخستن و پاراستنی یه‌كده‌نگیی نێو ماڵی كورد، كاركردن له‌سه‌ر جێبه‌جێكردن و به‌رجه‌سته‌كردنی ڕێبازی بارزانی كه له گرنگترینیان بنه‌ماكانی یه‌كسانی و عه‌داله‌تی كۆمه‌ڵایه‌تییه، لایه‌نێكی دیكه‌ی كۆبوونه‌وه‌كه بوو.
هه‌ر له كۆبوونه‌وه‌كه‌دا چه‌ندین پرسی دیكه‌ی په‌یوه‌ست به پرۆسه‌ی چاودێری و به‌داوادچوونی ئۆرگانه‌كانی پارتی له‌لایه‌ن ئه‌ندامانی ده‌سته‌وه پێشكه‌ش كران و ژماره‌یه‌ك پێشنیازیش خرانه ڕوو.
له‌مباره‌یه‌وه ته‌ها به‌رواری ئاماده‌یی نووسینگه‌ی جێگری سه‌رۆكی پارتی بۆ پشتیوانیكردنی كار و چالاكییه‌كانی ده‌سته‌ی چاودێری و به‌دواداچوونی پارتی دیموكراتی كوردستان و هه‌ماهه‌نگیكردن له‌گه‌ڵیان به‌مه‌به‌ستی سه‌رخستنی كاره‌كانیان، ده‌ربڕی.
کۆمێنت (0)
تا ئێستا هیچ کۆمێنتێک نەکراوە.