بەڕێوەبەرى پەیوەندیی و هەماهەنگییەکان لە وەزارەتى پێشمەرگە، عەمید روکن هەژار عومەر رایگەیاند "لە ئایندەدا هەماهەنگییەکانى نێوان کۆلێژى ئەرکانى پێشمەرگە و کۆلێژى ئەرکانى هاوبەشی عێراق زیاتر دەبێت.
لە لێدوانێکى بۆ ئاژانسى ئانادۆڵو، بەڕێوەبەرى پەیوەندیی و هەماهەنگییەکان لە وەزارەتى پێشمەرگە، عەمید روکن هەژار عومەر گوتى: رێککەوتن لە نێوان وەزارەتى پێشمەرگە و وەزارەتى بەرگریی عێراق کراوە، بۆ ئەوەى راهێنانى هاوبەش لە نێوان کۆلێژى ئەرکانى پێشمەرگە و کۆلێژى ئەرکانى هاوبەشی عێراق لە ئەکادیمیای زاخۆ ئەنجام بدرێت و راهێنانە هاوبەشەکان لە ئایندەدا زیاتر بکرێن.
گوتیشى: "لەئێستادا شاندێکى سەربازى کۆلێژى ئەرکانى هاوبەشی عێراق به سهرۆكایهتی راگری كۆلێژ، لیوا روكن محەمەد عەبدولرەزاق و شاندی یاوهری لە مامۆستایان و قوتابیانی خولی ٧٩ی كۆلێژی ئهركان پێکهاتوون لە هەولێرن، ئەم سەردانەیان وەک سەردانێکى زانستى ئەنجامداوە".
عەمید روکن هەژار عومەر دەڵێت "وەزارەتى بەرگریی عێراق و وەزارەتى پێشمەرگە بەڵێنى ئەوەیانداوە کە پەرە بە پەیوەندییەکانى نێوانیان بدەن و هەماهەنگییەکانى نێوانیان بەرەو قۆناغێکى باشتر ببەن، هەر لەم چوارچێوەیەدا کۆلێژى ئەرکانى هاوبەشی عێراق و کۆلێژى ئەرکانى پێشمەرگە لە چەند رۆژى داهاتوو دەست دەکەن بە راهێنانى هاوبەش".
دەشڵێت "بڕیارە شاندەکەى کۆلێژى ئەرکانى هاوبەشی عێراق سەردانى هەریەکە لە کۆلێژى ئەکادیمیاى زاخۆ و کۆلێژى ئەکادیمیاى قەڵاچوالان بکەن".
- "گەشبینین بە رێکخستنەوەى یەکەى ٧٠ و یەکەى ٨٠ى لە کابینەى نوێى حکوومەتدا"
بەڕێوەبەرى پەیوەندیى و هەماهەنگییەکان لە وەزارەتى پێشمەرگە باس لە رێکخستنەوەى یەکەى ٧٠ و یەکەى ٨٠ى هێزەکانى پێشمەرگە دەکات و دەڵیت "پێویستیمان بە سوپایەکى رێکخراو دوور لە سیماى حزبى هەیە، بۆ ئەم مەبەستە ٣٥ پڕۆژەى چاکسازیمان هەیە لە وەزارەتى پێشمەرگە، یەکێک لە پڕۆژەکان رێکخستنەوەى یەکەى ٧٠ و یەکەى ٨٠ى هێزەکانى پێشمەرگەیە".
عەمید روکن هەژار گوتیشى: "زۆر گەشبینین کە لە کابینەى نۆیەمى حکوومەت رێکخستنەوە لە هێزەکانى پێشمەرگە لە چوارچێوەی سوپایەکى رێکخراو بێتە ئاراوە، راوێژکارانى هاوپەیمانان لە پڕۆژەى رێکخستنەوەى یەکەى ٧٠ و یەکەى ٨٠ى هێزەکانى پێشمەرگە رۆڵیان هەیە".
سهرچاوه - AA
دانانى ههواڵ - شوان عهزیز
کۆمێنت (0)
تا ئێستا هیچ کۆمێنتێک نەکراوە.