سەرۆکی حکوومەتی هەرێمی کوردستان لەگەڵ شاندێكی باڵای هه‌رێمی بادن ڤۆرتمبێرگی ئه‌ڵمانی کۆبووەوە.
پاشنیوه‌ڕۆی ئه‌مڕۆ سێشه‌ممه 16/4/2018، نێچیرڤان بارزانی، سه‌رۆك وه‌زیرانی هه‌رێمی كوردستان لەگەڵ شاندێكی باڵای هه‌رێمی بادن ڤۆرتمبێرگی ئه‌ڵمانیدا کۆبووەوە و په‌ره‌پێدانى په‌یوه‌ندییه‌كانیان تاوتوێ کرد.
لەو کۆبوونەوەیەدا نێچیرڤان بارزانی، سوپاسی پشتگیری و هاوكارییه به‌رده‌وامه‌كانی گه‌ل و حكوومه‌تی ئه‌ڵمانیا و هه‌رێمی بادن ڤۆتمبێرگ له كاته سه‌خته‌كاندا بۆ هه‌رێمی كوردستان كرد به‌تایبه‌تی له بواره‌كانی سه‌ربازی و مرۆییدا، هه‌روه‌ها پوخته‌یه‌كیشی ده‌رباره‌ی قۆناغی ڕووبه‌ڕووبوونه‌وه‌ی تیرۆرستانی داعش و له‌خۆگرتنی ژماره‌یه‌كی زۆری ئاواره و په‌نابه‌ران پێشكه‌ش كرد و به پێویستی زانی دوای ئه‌م قۆناغه كاری هاوبه‌ش بۆ ڕووبه‌ڕووبوونه‌وه‌ی بیرى توندڕه‌ویی داعش له ناوچه‌كه بكرێت.
هه‌ر له كۆبوونه‌وه‌كه‌دا، شاندی میوان كه له تیریسا باوه‌ر وه‌زیری زانست و لێكۆڵینه‌وه و تێرێزا شۆپێر وه‌زیری ده‌وڵه‌ت له هه‌رێمی بادن ڤۆرتمبێرگ و باربارا وۆڵف كونسولی گشتیی ئه‌ڵمانیا له هه‌رێمی كوردستان و چه‌ند په‌رله‌مانتارێكی په‌رله‌مانی هه‌رێمه‌كه پێكهاتبوو، خۆشحاڵیی خۆیان به سه‌ردانی هه‌رێمی كوردستان و له نزیكه‌وه ئاگاداربوون له ڕه‌وشی هه‌رێم و په‌نابه‌ران ده‌ربڕی و ڕۆڵ و قوربانیدانی خه‌ڵك و پێشمه‌رگه و حكوومه‌تی هه‌رێمی كوردستانیان له حه‌واندنه‌وه و پاراستنی ئاواره‌كان له مه‌ترسیی تیرۆر به‌رز نرخاند.
شاندی میوان په‌ره‌پێدانی په‌یوه‌ندییه‌كانی نێوان هه‌رێمی كوردستان و هه‌رێمی بادن ڤۆرتمبێرگیان له هه‌موو بواره‌كاندا به‌تایبه‌ت له بواره‌كانی په‌روه‌رده و فێركردن، یارمه‌تیی مرۆیی، ژینگه و ته‌ندروستیدا دووپات كرده‌وه و ئاماده‌ییی خۆیان بۆ هه‌ر هاوكارییه‌ك له‌گه‌ڵ حكوومه‌تی هه‌رێمی كوردستان له داهاتوودا نیشان دا.
له به‌شێكی دیكه‌ی كۆبوونه‌وه‌كه‌دا نێچیرڤان بارزانى، سوپاسی ده‌ستپێشخه‌ریی هه‌رێمی بادن ڤۆرتمبێرگی كرد له چاره‌سه‌ركردنی منداڵ و كچانی ڕزگاركراوی ئێزدی له ده‌ستی داعش كه كاریگه‌رییه‌كی زۆر باشی بۆ گه‌ڕانه‌وه‌یان بۆ ناو كۆمه‌ڵگه هه‌بوو، هه‌روه‌ها ئاماژه‌ی به‌وه دا كه هه‌وڵه‌كانی حكوومه‌تی هه‌رێمی كوردستان بۆ ڕزگاركردنی كچ و كوڕانی ئێزدی له ده‌ستی داعش به‌رده‌وامه و تا كۆتاییش به‌رده‌وام ده‌بێت
هه‌ردوولا له‌سه‌ر په‌ره‌پێدانى په‌یوه‌ندییه‌كان نه‌ك ته‌نیا له‌سه‌ر ئاستی ده‌زگاكانی حكوومه‌ت، به‌ڵكو له‌سه‌ر ئاستی په‌رله‌مانی هه‌ردوو هه‌رێم كۆك بوون.
کۆمێنت (0)
تا ئێستا هیچ کۆمێنتێک نەکراوە.