ئه‌نجوومه‌نی ئاسایشی نێوده‌وڵه‌تی پێشوازی لە کۆبوونەوەی نێوان نێچیرڤان بارزانی و عادل عەبدولمەهدی بۆ چارەسەری کێشەکانی هەولێر و بەغدا ده‌كات.
ئێوارەی رۆژی چوارشەممە، ئەنجوومەنی ئاسایشی نەتەوەیەکگرتووەکان کۆبوونەوەیەکی تایبەتی لەبارەی دۆخی عێراق ئەنجامدا.
لە کۆبوونەوەکەدا یانین هێنس-پلاس سخارت، نێردەی نەتەوەیەکگرتووەکان بۆ عێراق، راپۆرتێکی پێشکەشکرد و باسی لە پرسەکانی عێراق و هەرێمی کوردستان کرد.
له راپۆرته‌كه پلاس سخارت، پێشوازی لە هاوئاهەنگی و رێککەوتنەکانی نێوان حکوومەتی هەرێمی کوردستان و حکوومەتی عێراق کرد و گوتی: داوا لە بەغدا و هەولێر دەکەم ئەم دەرفەتە بقۆزنەوە بۆ نەهێشتنی جیاوازییەکانیان و گەیشتنە چارەسەرێکی ماوەدرێژ دەربارەی بابەتە دیارەکان.
له به‌شێكی کۆبوونەوەی ئەنجوومەنی ئاسایشی نێودەوڵەتی لەبارەی عێراق، کاکو لیۆ ئادۆم، باڵیۆزی کۆتدیڤوار و ئەندامی ئەنجوومەنی ئاسایش، لە گوتارێکدا پێشوازی لە کۆبوونەوەکەی نێچیرڤان بارزانی، سەرۆکوەزیرانی هەرێمی کوردستان و عادل عەبدولمەهدی، سەرۆکوەزیرانی عێراق کردو رایگه‌یاند: پێشوازی لە کۆبوونەوەی نێوان نێچیرڤان بارزانی و عادل عەبدولمەهدی دەکەین بەتایبەتی دوای ئەو کێشانەی کە بەهۆی گشتپرسی و دۆخی کەرکووکەوە، لەنێوان حکوومەتی عێراق و حکوومەتی هەرێمی کوردستان دروست ببوون.
ئاشكراشی كرد كه هانی گفتوگۆی بەرهەمدار لەنێوان بەرپرسانی حکوومەتی ناوەندی عێراق و حکوومەتی هەرێمی کوردستان دەدات، بۆ دۆزینەوەی چارەسەری ئاشتییانە بۆ ئەو کێشانەی کە له‌دوای گشتپرسی بۆ راگەیاندنی سەربەخۆیی لە 2017 روویاندا.
وڵاتەکەم هیواخوازە ئەو کۆبوونەوانەی لە نێوان عادل عەبدولمەهدی، سەرۆکوەزیرانی عێراق و نێچیرڤان بارزانی سەرۆکوەزیرانی هەرێمی کوردستان ئەنجامدەدرێن، ببێتە هۆی ئەوەی بتوانن کێشەکانیان چارەسەر بکەن.
کۆمێنت (0)
تا ئێستا هیچ کۆمێنتێک نەکراوە.