مەکتەبی سیاسی پارتی بە بۆنەی ساڵی نوێی زایینی په‌یامێکی پیرۆزبایی بڵاوکرده‌وه‌

به‌بۆنه‌ى سه‌رى ساڵى نوێوه‌، مەکتەبی سیاسی پارتی دیموكراتى كوردستان، په‌یامێكی پیرۆزبایی بڵاوكرده‌وه‌.

له‌په‌یامه‌كه‌، مه‌كته‌بى سیاسی پارتى، هیوا ده‌خوازێت، له‌ ساڵى 2019 مەینەتی و قەیران و کێشەکانی رابردوو بە یەکجاری کۆتاییان بێت و گەلە خۆڕاگرەکەمان پێ بنێتە قۆناغ و ژیانێکی ئاسودەتر و خۆشگوزەرانتر.

ده‌قى په‌یامه‌كه‌:

بە ناوی خوای بەخشندە و میهرەبان

بەبۆنەی سه‌ری ساڵی (2019)ی زایینی بە گەرمی پیرۆزبایی لە تێکڕای رۆڵەکانی گەلەکەمان دەکەین بەو ئومێدەی سالێ نوێ پڕ لە خێرو خۆشی و بەرەکەت بێت بۆ هەموو لایەک.

لە پێشوازی ساڵی نوێدا ئومێد دەکەین مەینەتی و قەیران و کێشەکانی رابردوو بە یەکجاری کۆتاییان بێت و گەلە خۆڕاگرەکەمان پێ بنێتە قۆناغ و ژیانێکی ئاسودەتر و خۆشگوزەرانتر. بەو هیوایەی سەرەتای ساڵی نوێ سەرەتای بەئەنجامگەیشتنی دانوستانی هێزە سیاسییەکان و دەستبەکاربوونی دامەزراوەکانی کوردستان پەرلەمان و سەرۆکایەتی هەرێم و حکومەتی نوێ بێت بۆ هەرچی زیاتر خزمەتکردنی گەلە شایستەکەمان.

لەم بۆنەیەدا جارێکی دیکە بەڵێن بۆ گەلی خۆمان نوێدەکەینەوە کە هەمیشە پەرۆشی سەربەرزی و خۆشگوزەرانیی و دابینکردنی ئاشتی و تەناهی کوردستانێکی بەهێز بین و لەو پێناوەدا درێغی نەکەین.

لە دەسپێکی ساڵی نوێدا پیرۆزبایی تایبەت ئاراستەی کەسوکاری سەربەرزی شەهیدان و پێشمەرگە قارەمانەکان دەکەین کە هەر لە سایەی ئەواندایە ساڵان بەڕێ دەکەین و کوردستان هەر سەرفراز و و ئاوەدان و پارێزراوە. هەروەها پیرۆزبایی لە هەڤاڵ و کادیران و تێکڕای ئەندام و لایەنگرانی پارتیمان و تەواوی حزب و لایەنە سیاسییەکان دەکەین و ئومێدەوارین بە هەوڵ و هیممەتی هەموو لایەک ساڵ بە ساڵ رەوشی کوردستان لە هەموو رویەکەوە بەرەو باشتر ببەین.

 
جارێكی دیكه‌ ساڵی (2019)ی زاینی پیرۆزبێت و كوردستان هه‌ر ئاوادان بێت.

مەکتەبی سیاسی
پارتی دیموکراتی کوردستان
۳۱ی۱۲ی۲٠۱۸