ڕۆژی پێنجشەممە 27ـی 12ـی 2018 لە سەلاحەددین سەرۆك مەسعود بارزانی پێشوازی لە كاردینال پێترۆ پارۆلین سەرۆك وەزیرانی ڤاتیكان و شاندێكی یاوەری كرد كە پێكهاتبوون لە ژمارەیەك لە ڕاوێژكارانی حكوومەتی ڤاتیكان و پیاوانی ئایینی مەسیحی لە هەرێمی كوردستان.
لە دیدارەكەدا سەرۆك وەزیرانی ڤاتیكان سڵاو و ڕێزی تایبەتی قەداسەتی پاپای بە سەرۆك بارزانی گەیاند، هەروەها سوپاسی هەوڵەكانی سەرۆك بارزانی و حكوومەتی هەرێمی كرد بۆ پاراستنی پێكهاتەی مەسیحی لە كوردستان و عێراق و، ئامانجەكانی سەردانەكەی بۆ هەرێمی كوردستان بۆ سەرۆك بارزانی شی كردەوە و ڕایگەیاند كە هانی باشتركردنی دۆخی هەموو لایەك دەدات لە كوردستان و عێراق و داوایشی كرد كە بار و گوزەران و دۆخی ئاساییشی موسڵ و ناوچەكانی نەینەوا باشتر بكرێت بۆ ئەوەی ئاوارەكان بتوانن بگەڕێنەوە سەر ژیانی ئاسایی خۆیان.
لەدرێژەی وتەكەیدا سەرۆك وەزیرانی ڤاتیكان سوپاسی سەرۆك بارزانی كرد بۆ پابەندبونی بەرانبەر قووڵتركردنی پێكەوەژیان و پاراستنی دۆخی پێكهاتەكان و دابینكردنی ئارامی و باشتركردنی بارودۆخی ژیان. لەبارەی پەیوەندییەكانی نێوان هەرێم و بەغدایش سەرۆك وەزیرانی ڤاتیكان ئەوەی خستەڕوو كە هانی هەردوولا دەدات كە گرفتەكانیان بە دیالۆگ و ئاشتی چارەسەر بكەن و لەمبارەیەوە گەشبینیی خۆی بە سەرۆك بارزانی ڕاگەیاند.
لەبارەی شەڕی تیرۆریشەوە سەرۆك وەزیرانی ڤاتیكان پێزانینی هەبوو بۆ قوربانیدانی هەرێمی كوردستان لەو شەڕەدا و جەختیشی لەوە كە پێویستە شەڕی ئایدیۆلۆژیای تیرۆریش بكرێت لەپێناو بنبڕكردنی فكری تیرۆر. ئەوەیشی خستەڕوو كە خۆی و وڵاتەكەی دوعا دەكەن بۆ خێر و خۆشی بۆ گەلی كوردستان.
لای خۆیەوە سەرۆك بارزانی بەگەرمی بەخێرهاتنی سەرۆكوەزیرانی ڤاتیكان و شاندی یاوەری كرد و سوپاسی قەداسەتی پاپای كرد و وێڕای ئاماژەدان بە فەرهەنگی پێكەوەژیانی گەلی كوردستان ئەوەی ڕاگەیاند كە لەكاتی پەلاماری تیرۆریستانی داعش بە خوشك و برا مەسیحییەكانی ڕاگەیاندووە كە هەموومان چارەنووسی هاوبەشمان هەیە و لە مردن و ژیاندا بەیەكەوە دەبین. سەرۆك بارزانی ئاماژەی بە تاوان و بەدڕەوشتییەكانی تیرۆریستان و قوربانیدانی خەڵكی كوردستان دا و ئەوەی دووپات كردەوە كە پێویستە هەموو لایەكمان و كۆمەڵگەی نێودەوڵەتی هانی خوشك و برا مەسیحییەكان بدەین كە لە وڵاتی خۆیان بمێننەوە و هاندانیان بۆ جێهێشتنی وڵات بە بابەتێكی هەڵە وەسف كرد.
هەروەها داوایشی كرد كە كۆمەڵگەی نێودەوڵەتی بۆ یارمەتیدانی ژیان و گوزەرانی پێكهاتەكان و ئاوارەكان بێتە سەر هێڵ. سەرۆك بارزانی شانازیشی بە فەرهەنگی پێكەوەژیان و ڕێزگرتنی بەرانبەر و یەكترقبووڵكردنی جیاوازیی نەتەوایەتی و ئاییینی لەناو خەڵكی كوردستان كرد و ڕایگەیاند كە ئێمە هەموومان لە مرۆڤبووندا برای یەكترین و بە ئاكاری باش و مرۆڤسالارانە دەتوانین بە ئاشتی لەگەڵ یەكتردا بژیین.
لەبارەی هەڕەشەی تیرۆر سەرۆك بارزانی جەختی لەوە كردەوە كە تیرۆر بەهۆی كۆمەڵێك هۆكارەوە سەری هەڵداوە و ئەگەر ئەو هۆكارانە چارەسەر نەكرێ لە ئاییندەدا مەترسیی گەورەتر لە داعش سەر هەڵدەداتەوە.
پەیوەست بە پەیوەندییەكانی نێوان هەرێم و بەغدا سەرۆك بارزانی ئەوەی دووپاتكردەوە كە هەمیشە كوردستان لایەنگری زمانی دیالۆگ بووە و شەڕی نەویستووە و ڕاشیگەیاند كە لە هەوڵی ئەوە دان كە كێشەكان چارەسەر بكرێن و ئاماژەیشی بە كەسایەتیی عادل عەبدولمەهدی سەرۆك وەزیرانی تازەی عێراق دا كە كەسێكی كراوە و لایەنگری لێكتێگەییشتن و چارەسەری كێشەكانە و پشتیوانیی خۆیشی بۆ سەرۆك وەزیرانی تازەی عێراق و حكوومەتەكەی بۆ چارەسەركردنی كێشەكان و باشتركردنی بارودۆخ و ژیانی خەڵك دووپات كردەوە.
کۆمێنت (0)
تا ئێستا هیچ کۆمێنتێک نەکراوە.