ئۆفیسی تایله‌ندی رێكخراوی نه‌ته‌وه یه‌كگرتووه‌كان له راپۆرتێكدا رایگه‌یاند كه برسیه‌تیی و به‌دخۆراكیی له كیشوه‌ری ئاسیادا به‌رۆكی ملیۆنان كه‌سی گرتووه كه ئه‌و ژماره‌یه‌ش نزیكه‌ی 486 ملیۆن كه‌سه.
به‌گوێره‌ی راپۆرتی ئه‌م رێكخراوه به سه‌دان ملیۆن منداڵ و كه‌سی پێگه‌یشتوو له شاره ئاسیاییه‌كانی روو له گه‌شه‌ی ئه‌م كیشوه‌ره‌دا ده‌سته‌ویه‌خه‌ی برسیه‌تیی و به‌دخۆراكین، ئه‌وه‌ش له‌كاتێكدایه كه به‌ڕای نه‌ته‌وه یه‌كگرتووه‌كان تا ساڵی 2030 برسیه‌تی له ئاستی جیهاندا ریشه‌كێش ده‌كرێت.
به‌ڕێوه‌به‌رانی ناوچه‌یی رێكخراوی خۆراك و كشتوكاڵ (FAO) و سندوقی منداڵان (یونیسێف) و پڕۆگرامی جیهانیی خۆراك (WFP) و رێكخراوی ته‌ندرووستیی جیهانیی (WHO) له‌م راپۆرته‌دا جه‌ختیان كردووه‌ته‌وه له‌سه‌ر ئه‌وه‌ی كه: پڕۆگرامه‌كانی ریشه‌كێش كردنی هه‌ژاریی له ناوچه شارنشینه‌كانی كیشوه‌ری ئاسیادا گه‌شه‌ی ئه‌وتۆی به‌خۆیه‌وه نه‌دیتووه و ئه‌م پڕۆگرامانه هاوئاهه‌نگ نییه له‌گه‌ڵ خێرایی كۆچی گوندنشینان بۆ شاره‌كان.
جیا له‌وه قه‌ڵه‌ویی یه‌كێكی دیكه له‌و دیارده خراپانه‌یه كه ژماره‌یه‌ك وڵاتی ئاسیا به هۆی زۆر به‌كارهێنانی شه‌كر و خوێ و خواردنه خێراكان تووشی بوون و له‌ناو ئه‌م وڵاتانه‌شدا ده‌توانین ئاماژه بكه‌ین به مالیزیا و تایله‌ند.
شایه‌نی ئاماژه‌یه برسیه‌تیی مه‌زنترین مه‌ترسییه بۆسه‌ر ته‌ندرووستیی مرۆڤه‌كان و ژماره‌ی ئه‌و كه‌سانه‌ی كه به‌م هۆیه‌وه گیان له‌ده‌ست ده‌ده‌ن زیاتره له ژماره‌ی قوربانییانی ده‌ستی نه‌خۆشییه‌كانی وه‌ك ئایدز و مه‌لاریا و سیل.
سه‌رچاوه / عه‌ره‌بییه
مه‌سعود / كوردستان تیڤی
کۆمێنت (0)
تا ئێستا هیچ کۆمێنتێک نەکراوە.