ئەمڕۆ دادگای باڵای فیدڕاڵیی عێراق بڕیاریدا بە هەڵوەشاندنی بڕیاری دیاریکردنی پسۆرێکی هونەری بۆ لێکۆڵینەوە لە پرسی دەرهێنان و فرۆشتنی نەوت لەلایەن هەرێمی کوردستانەوە.
ئامانج ڕەحیم سکرتێری ئەنجومەنی وەزیرانی هەرێم ڕایگەیاند، بڕیاری ڕەتکردنەوەکە بەھۆی لایەنگیریی ئەو شارەزایە بوو کە پێشتر بۆچوونی لە بەرژەوەندی وەزارەتی نەوت دەربڕیوە، ئەمەش نەگونجاوە لەگەڵ بنەمای بێلایەنی لە کاری شارەزادا.
هەروەها دادگای فیدراڵی لە ڕاگەیەندراوێکدا ئاماژەی بەوەکرد، لە کۆبوونەوەکەی ئەمڕۆدا کە نوێنەری هەرێم و عێراق ئامادەبوون، گفتوگۆ لەبارەی سکاڵایەکی وەزارەتی سامانە سروشتییەکانی هەرێمەوە کرا، کە داوای ڕەتکردنەوەی ئەو شارەزایەی کردبوو لەبەرئەوەی بێلایەن نییە.
دەشڵێت" دادگا ئەوەی بەدیکردووە، كه ئەو شارەزایە پێشتر بۆچوونی لەبارەی بابەتێکەوە خستووەتەڕوو، کە پەیوەندی بە سکاڵاکەی وەزارەتی نەوتەوە هەیە.
هاوکات دادگای فیدراڵی داوای لە سەندیکای زەویناسانی عێراق کرد لیستی ناوی شارەزایانی لە بواری نەوت پێشکەش بکات، بۆئەوەی شارەزایەک بۆ لێکۆڵینەوە لە نەوتی هەرێم لە نێویاندا دیاری بکرێت.
ئیاس ساموک وتەبێژی دادگای فیدراڵی باسی لەوە کرد، دادگا بڕیاریداوە لایەنی سکاڵاکار و سکاڵالێکراو ڕابسپرێت لە ماوەیەکی دیاریکراودا یەک یان سێ شارەزا دیاری بکەن، بەڵام هەردوولا لەسەر ئەوە ڕێککەوتون پڕۆسەی دیاریکردنی شارەزا بۆ دادگا جێبهێڵن، دادگاش بڕیاریداوە بە هەماهەنگی لەگەڵ هەرێم و بەغدا ئەو شارەزایە دیاری بکات، دانیشتنەکەش بۆ ڕۆژی ٩ی مانگی داهاتوو دواخرا.
کۆمێنت (0)
تا ئێستا هیچ کۆمێنتێک نەکراوە.