لە سلێمانی بە هەماهەنگی لایەنە پەیوەندیدارەكان و بە بەرنامەیەكی تۆكمەوە كار بۆ نەهێشتنی دیاردەی سواڵكردن بە منداڵای خوار 18 ساڵ دەكرێت، قائیمقامی سلێمانیش رایدەگەیەنێت تەنها رێژەی لەسەدا پێنج ئەو مناڵانەی سواڵ دەكەن خەڵكی سلێمانین.
ئەمرۆ سێ شەممە 10/7/2018 ئاوات محەمەد قائیمقامی سلێمانی لە دیوانی قائیمقامییەت لەگەڵ نوێنەرانی هەریەك لە ( داواكاری گشتی، دادوەری نەوجەوانان ، یەكێتی زانایانی ئاینی، ئاسایشی سلێمانی، پۆلیسی نەوجەوانان، رێكخراوی منداڵپارێز، چاودێری كۆمەڵایەتی) كۆبوویەوە.
لایەنە بەشداربووەكانی كۆبوونەوەكە بەچری گفتوگۆیانكرد لەبارەی دانانی چەند میكانیزمێكی گونجاو بۆ رووبەرووبوونەوەی دیاردەی ئیشكردن و سواڵكردن بە منداڵانی نەوجەوان چۆنییەتی كۆنترۆڵكردنی ئەو دیاردەیە، پاشان ئاوات محەمەد ناوەرۆك و بریاری كۆبوونەوەكەی لەكۆنگرەیەكی رۆژنامەوانیدا خستە روو و رایگەیاند: لە ماوەی 6 مانگی رابردوودا لە لایەن پۆلیسی نەوجەوانان و دادوەری گشتی و مناڵپارێزەوە 235 منداڵ بەهۆی سواڵكردنەوە گیراون، بۆ زاڵبوونیش بەسەر ئەو دیاردەیە، بریاردراوە بە هەماهەنگیكردن لەگەڵ رێكخراوی نەتەوەیەكگرتووەكان و رێكخراوە ناوخۆییەكان و لایەنە پەیوەندیدارەكان لەداهاتوودا كۆبوونەوەیەك ئەنجامبدرێت بۆ دانانی بەرنامەیەكی توندوتوڵ و گونجاو كە بتوانێت رێگری بكات لە زۆربوونی ئەو دیاردەیە.
لە بەشێكی تری گۆنگرەكەدا قائیمقامی سلێمانی ئاماژەی بۆ ئەوەكرد كە رێژەی ئەو منداڵانەی لە فولكە و شەقام و شوێنە گشتییەكاندا سوڵدەكەن تەنها 5%ی خەڵكی سلێمانین و رێژەی 95% ئاوارەن و خەڵكی شارەكانی تری عیراقن ، ووتیشی هەموو هەوڵێك ئەدەین بۆنەهێستن و كەمكردنەوەی ئەو دیاردەیە.
ئامادەكردن/ نهسرین مزووری
کۆمێنت (0)
تا ئێستا هیچ کۆمێنتێک نەکراوە.