شەوی رابردوو لە ناحیەی خوڕماڵ 3000 مریشكی مرداربوو فڕێدراوەتە ناو سەرچاوەی ئاوی زەڵم لە نزیك پردی زەڵمی سەربە ناحیەی خورماڵ لەپارێزگای هەڵەبجە. ئه‌مه‌ش مه‌ترسی بۆ ته‌ندروستی گه‌شتیاران و خه‌ڵكی ناوچه‌كه دروست كردووه.
سامان كەریم بەڕێوەبەری گەشتوگوزاری هەڵەبجە لە كۆنگره‌یه‌كی رۆژنامه‌وانیدا رایگەیاند، لەو كارە بێدەنگ نابن و دەبێت ئەنجامدەرانی توندترین سزابدرێن.
گوتیشی لەلایەن خاوەنی هەر كێڵگەی پەلەوەرییەكەوە ئەنجادرابێت، مۆڵەتی لێدەسەنرێتەوە، چونكە ئەوە كارێكی نامرۆڤانەیە و دوورە لە هەموو بەهایەكەوە.
بەڕێوەبەری گەشتوگوزاری هەڵەبجە باسی لەوەشكرد، دەستبەجێ تیمەكانیان گەیشتونەتە پردی زەڵم، كە شوێنی فڕێدانی مریشكەكانە و دەركەوتووە نزیكەی سێ هەزار مریشكی مرداربوو فڕێدراونەتە ناو ئاوی سەرچاوەی زەڵم لە نزیك پردی زەڵم لەسەر رێگای سەرەكی هەڵەبجە سلێمانی.
گوتیشی: فڕێدانی ئەو مریشكانە هەرچەندە هۆكارێكن بۆ بڵاوبوونەوەی چەندین نەخۆشی، لەگەڵ ئەوەشدا بوونه‌ته هۆی ناشرینكردنی سیمای ناوچەكە، كە شوێنێكی گەشتیارییە و پیسكردنی ژینگەو ئاوی ناوچەكەی لێدەكەوێتەوە، بۆ ئەو مەبەستەش هێزەكانی پۆلیس و ئاسایش بەدواداچوونەكانیان دەستپێكردووە و بەردەوامیش دەبن تا دۆزینەوەی بكەرانی.
لای خۆیه‌وه مه‌حه‌مه‌د حه‌سه‌ن، سه‌رپه‌رشتیاری كۆكردنه‌وه‌ی خاشاك له سنوری هه‌ڵه‌بجه رایگه‌یاند: فڕێدانی ئه‌و مریشكانه كاره‌ساتی ژینگه‌یی هه‌یه و هه‌روه‌ها چه‌ندین گوندیش له‌سه‌ر ئه‌و چه‌مه‌یه‌و ده‌چێته‌وه سه‌ر ده‌ریاچه‌ی سیروان كه سه‌رچاوه‌ی ئاوی خواردنه‌وه‌یه جگه له بۆنه ناخۆشه‌كه‌ی.
کۆمێنت (0)
تا ئێستا هیچ کۆمێنتێک نەکراوە.